اٹالین نیوی کے سربراہ ایڈمرل والٹرگیراڈلی کا نیول ہیڈ کوارٹرزاسلام آباد کا دورہ، پاک بحریہ کے سربراہ ایڈمرل ظفر محمود عباسی سے ملاقات

منگل 20 مارچ 2018 23:18

اسلام آباد۔20مارچ(اُردو پوائنٹ اخبار آن لائن۔ منگل 20 مارچ 2018ء)اٹالین نیوی کے سربراہ ایڈمرل والٹرگیراڈلی نے نیول ہیڈ کوارٹرزاسلام آباد کا دورہ کیا اور پاک بحریہ کے سربراہ ایڈمرل ظفر محمود عباسی سے ملاقات کی ۔ نیول ہیڈ کوارٹرز آمد پر پاک بحریہ کے سربراہ نے اٹالین نیوی کے سربراہ کا استقبال کیا۔ پاک بحریہ کے چاق و چوبند دستے نے معزز مہمان کو سلامی پیش کی۔

سلامی کے بعدمعزز مہمان کا نیول ہیڈ کوارٹرز میں تعینات پرنسپل سٹاف آفیسرز سے تعارف کروایا گیا۔ بعد ازاں ، اٹالین نیوی کے سربراہ ایڈمرل والٹرگیراڈلی نے پاک بحریہ کے سربراہ سے ملاقات کی ۔ملاقات کے دوران پیشہ ورانہ اُموراوردو طرفہ بحری اشتراک پرتبادلہ خیال کیا گیا۔

(جاری ہے)

دونوں ممالک کی بحری افواج کے درمیان تعاون کے مختلف شعبے بھی زیرِ غور رہے ۔

پاک بحریہ کے سربراہ ایڈمرل ظفر محمود عباسی نے دہشت گردی کے خلاف جنگ میں پاکستان کے عزم اور کردار بالخصوص کولیشن میری ٹائم کمپین پلان اور بحری قزاقی کی بیخ کنی کے آپریشنزمیںپاک بحریہ کی شرکت پر روشنی ڈالی ۔ ایڈمرل والٹرگیراڈلی نے خطے میں بحری امن و استحکام کے قیام کے سلسلے میں پاک بحریہ کے کردار و خدمات کو سراہا۔ملاقات کے بعدعلاقائی مسائل کے متعلق پاک بحریہ کے نقطہ نظر اوربحرِ ہند میں امن و استحکام کے قیام میں پاک بحریہ کے کردارپر معزز مہمان کو ایک تفصیلی بریفنگ بھی دی گئی۔

بعد ازاں، اٹالین نیول چیف نے نیول ہیڈ کوارٹرز اسلام آبادمیں یادگارِ شہداء پر پھولوں کی چادر چڑھائی۔ دورے کے دوسرے مرحلے میں ایڈمرل والٹرگیراڈلی کراچی میں نیول فیلڈ کمانڈز کا دورہ کریں گے۔اٹالین نیول چیف کا یہ دورہ دونوں ممالک کی بحری افواج کے درمیان باہمی تعلقات میںمزید استحکام کا باعث بنے گا۔