زینب کو زیادتی کے بعد قتل کرنے والا قاتل پکڑ ا گیا ،انسداد دہشتگردی عدالت میں کیس چلے گا ‘ وزیر اعلیٰ پنجاب

لاہور(اُردو پوائنٹ اخبار آن لائن۔ منگل 23 جنوری 2018ء)وزیر اعلیٰ پنجاب محمد شہباز شریف نے قصور میں سات سالہ بچی کو زیادتی کے بعد قتل کرنے والے ملزم کی گرفتاری کا باضابطہ اعلان کرتے ہوئے کہا ہے کہ قاتل سیریل کلر ہے ،اس کے خلاف انسداد دہشتگردی عدالت میں کیس چلے گا ،اس کیس کے ٹرائل کو بلا تاخیر منطقی انجام تک پہنچانے کے لئے ٹیم تشکیل دی جائے گی اور میں خود اس کی نگرانی کروںگا ،پنجاب حکومت تمام قانونی تقاضے اور لوازمات پورے کرے گی اور ہم ایک لمحہ کیلئے بھی چین سے نہیں بیٹھیں گے ، پوری قوم کی خواہش ہے اس بھیڑے کو چوراہے میں لٹکایا جائے لیکن میں اور ہم سب قانون کے تابع ہیں ، اس کیلئے قانون کا جائزہ لیا جائے گا اور اس طرح کے واقعات میں کمی کیلئے قانون میں تبدیلی بھی کرنا پڑے تو تبدیلی کرنا ہو گی ۔

(جاری ہے)

وزیر اعلیٰ پنجاب محمد شہباز شریف نے زینب کے والد حاجی محمد امین انصاری ، وزیر قانون رانا ثنا اللہ خان ، وزیر انسداد دہشتگردی کرنل (ر) ایوب گادھی، پنجاب حکومت کے ترجمان ملک محمد احمد خان کے ہمراہ ماڈل ٹائون میں پریس کانفرنس میں یہ اعلان کیا ۔اس موقع پر چیف سیکرٹری پنجا ب کیپٹن (ر) زاہد سعید، آئی جی پنجاب کیپٹن (ر) عارف نواز خان ، جے آئی ٹی کے ممبران ،ڈی جی فرانزک سائنس ایجنسی سمیت دیگر اعلیٰ افسران بھی موجود تھے۔

وزیر اعلی پنجاب نے کہا کہ میں اس درندہ صفت کی گرفتاری پر پوری کابینہ کمیٹی ، سیاسی رفقاء، تمام انٹیلی جنس اداروں کا شکریہ ادا کرتا ہوں - میں آرمی چیف ، ڈی جی آئی ایس آئی، ڈی جی فرانزک لیب کا بھی مشکور ہوں جنہوں نے اس کیس کو حل کرنے میں بھرپور مدد اور تعاون فراہم کیا- انہوںنے کہا کہ ملزم کی گرفتاری کے لئے فرانزک لیب میں 1150 ڈی این اے کی پروفائلنگ ہوئی اور درندہ صفت کا ڈی این اے سوفیصد میچ کر گیا-اس درندے کا کا پولی گرافک ٹیسٹ بھی ہوا جس میں اس نے اپنی تمام درندگیوں اور سیاہ کاریوں کا اعتراف کر لیا ہے - انہوںنے کہا کہ زینب کے قاتل کو گرفتار کرنے والی پوری ٹیم اور تعاون کرنے والے تمام ادارے اس قوم کے درخشندہ ستارے ہیں - انہوںنے کہا کہ میں اور میری ٹیم ذاتی طور پر اس کیس پر پیشرفت کا جائزہ لیتے رہے ہیں اور اس ٹیم نے قوم کے عظیم سپوتوں کی طرح کیس کی اس طرح پیروی کی جیسے یہ واقعہ خدا نخواستہ ان کی اپنی بیٹی سے ہوا ہو- پوری ٹیم نے درد دل کے ساتھ راتوں کو جاگ کر کام کیا ہے اور میرے سیاسی کیریئر میں مشترکہ کاوش کی شائد ہی کوئی اور ایسی مثال ہو - اس سے ظاہر ہوتا ہے کہ ہم پر جب کوئی امتحان کا وقت آتا ہے تو قوم ذاتی مفادات کو ایک طرف رکھ کر عظیم مقصد کے حصول کے لئے اکٹھے ہو جاتے ہیں- اللہ تعالی کا بے پناہ فضل و کرم ہے کہ انتہائی انتھک محنت، ایمانداری اور خلوص دل سے کی گئی کاوشیں رنگ لائی ہیں اور قوم کی بیٹی زینب کا قاتل گرفتار ہو ا ہے - زینب کو تو میں واپس نہیں لا سکتا لیکن متاثرہ خاندان کو انصاف کی فراہمی کیلئے جان لڑا دوں گا- اس کی یقین دہانی میں نے حاجی امین انصاری کو قصور میں ملاقات کے دوران بھی کرائی تھی-درندے کی گرفتاری کا پہلا مرحلہ مکمل ہو گیا ہے - اب اس بھیڑیے نما درندے کے سفاکانہ عمل پر اسے کیفرکردار تک پہنچانے کا دوسرا مرحلہ شروع ہونا ہے - آئندہ ایسے واقعات کی روک تھام کیلئے اسے عبرتناک سزا دینا ضروری ہے - اگر قانون میں تبدیلی کرنا پڑے تو کرنا ہو گی- زینب تواس دنیا سے چلی گئی ابھی اس کی زندگی کا پھول کھلا ہی تھا کہ ظالم نے اسے مسل دیا - جس طرح ظالم نے اس معصو م کلی کو کچلا ہے اسی طرح قانو ن کے آہنی ہاتھوں سے اس ظالم کو بھی کچلنا چاہیے تب ہی درندگی میں کمی آئے گی- انہوںنے کہا کہ میں ڈی جی فرانزک سائنس ایجنسی کا بھی شکر گزار ہوں جن کی دن رات کاوشوں کی بدولت ملزم کی گرفتار ی ممکن ہو ئی ہے اگر یہ ایجنسی نہ ہو تی تو شائد ہمیں کامیابی نہ ملتی - بھرپور تعاون پر نادرا کا بھی شکرگزار ہوں - اس واقعہ پر احتجاج ہوا اور سیاسی شعبدہ بازی بھی کی گئی - میری ایسے عناصر سے ہاتھ باندھ کر درخواست ہے کہ خدا را لاشوں پر سیاست نہ کی جائے ورنہ یہ آگ آپ کے گھروں تک بھی جا سکتی ہے - انہوںنے کہا کہ مردان میں ظلم اور زیادتی کا شکار ہونے والی معصوم بچی عاصمہ بھی اس قوم کی بیٹی ہے جو سفاکی کی نظر ہوئی - میں درد دل کے ساتھ خیبر پختونخوا حکومت سے درخواست کرتا ہوں کہ ہماری فرانزک لیب حاضر ہے اور ہم ہر قسم کے تعاون کیلئے تیار ہیں - کراچی میں ہونے والے نقیب اللہ محسود کے واقعہ کے حوالے سے جو بھی سائنسی و تکنیکی معاونت درکار ہے ہم حاضر ہیں - یہ وقت لاشوں پر سیاست کرنے کا نہیں ، آئیں مل بیٹھ کر قوم کے دکھ بانٹیں اور وطن عزیز کے مسائل کو حل کریں - ایسا کرنے سے ہی پاکستان اپنا وجود دنیا سے تسلیم کرائے گا- وزیر اعلی نے ایک سوال کے جواب میں کہا کہ تمام اداروں کے باہمی تعاون اور اجتماعی کاوشوں کی بدولت ہمیں کامیابی ملی ہے اور ہم مردان کی عاصمہ کے قاتلوں تک پہنچنے کیلئے کے پی کے حکومت کے ساتھ ہر ممکن تعاون کرنے کے لئے تیار ہیں - ایک سوال کے جواب میں وزیر اعلی نے کہا کہ جن لوگوں سے اس واقعہ میں کوتاہی ہوئی ہے ان کی باز پرس بھی ہو گی- میں اس طرح کی درندگی کا شکار ہونے والی دوسری بچیوں کے لواحقین سے بھی ملوں گا اور انہیں بھی انصاف کی فراہمی یقینی بنائی جائے گی- زینب کے والد حاجی امین انصاری نے کہا کہ میں اب تک کی پیشرفت پر مطمئن ہوں اور ملزم کی گرفتاری پر وزیر اعلی شہباز شریف ، آرمی چیف اور چیف جسٹس آف پاکستان کا شکر گزار ہوں اور ان تمام اداروں کا بھی شکریہ ادا کرتا ہوں جن کی اجتماعی کاوشوں کی بدولت میری بیٹی کا قاتل قانون کے شکنجے میں آیا ہے -ڈی جی فرانزک سائنس ایجنسی نے کیس کے بارے میں بریفنگ دیتے ہوئے بتایا کہ اس کیس کی سائنسی بنیادوں پر تفتیش کی گئی ہے اور ہماری سائنس ایجنسی دنیا کی دوسری بڑی فرانزک لیب ہے -