وزیر خارجہ نے بھارت اور اسرائیل کے درمیان ہونے والے معاہدوں کو اسلام دشمنی قرار دیدیا

بھارت اسرائیل گٹھ جوڑ کے باوجود اپنا دفاع کر سکتے ہیں، خواجہ آصف

منگل 16 جنوری 2018 23:05

اسلام آباد (اُردو پوائنٹ اخبار آن لائن۔ منگل 16 جنوری 2018ء)وزیر خارجہ خواجہ آصف نے بھارت اور اسرائیل کے درمیان ہونے والے معاہدوں کو اسلام دشمنی قرار دیتے ہوئے کہا ہے کہ اس گٹھ جوڑ کے باوجود ہم بہت مؤثر طریقے سے اپنا دفاع کر سکتے ہیں۔ایک انٹرویو میںوزیر خارجہ خواجہ آصف نے کہاکہ بھارت اور اسرائیل کے مقاصد ایک ہی ہیں، بھارت کشمیر میں مسلمانوں کے علاقے پر قبضہ کر کے بیٹھا ہوا ہے جبکہ اسرائیل بھی فلسطین میں مسلمانوں کے بہت بڑے علاقے پر قبضہ کر کے بیٹھا ہے۔

(جاری ہے)

خواجہ آصف نے کہا کہ کشمیر کے معاملے پر پاکستان کی ایک قسم کی بقا وابستہ ہے جبکہ پاکستانی قوم فلسطینیوں کے ساتھ جذباتی وابستگی رکھتی ہے۔انہوں نے کہا کہ پاکستان نے کبھی اسرائیل کو تسلیم نہیں کیا اور بھارت اور اسرائیل کا گٹھ جوڑ اسلام دشمنی ہے۔انہوںنے کہاکہ پاکستانی حکومت کسی گھبراہٹ سے دوچار نہیں ہے اور دہشت گردی کے خلاف جنگ میں بہت قربانیوں کے بعد کامیابی حاصل کی ہے۔وزیر خارجہ نے مزید کہا کہ ہماری افواج دہشت گردی کے خلاف بھرپور انداز میں لڑ رہی ہیں اور ہماری دفاعی استعداد میں اضافہ ہوا ہے۔انہوںنے کہاکہ ہم بھارت اور اسرائیل کے گٹھ جوڑ کے باوجود اپنا دفاع بہت مؤثر طریقے سے کر سکتے ہیں۔