فیض آباد دھر نا آپریشن ناکامی پر پہلا آفٹر شاک

ایڈیشنل آئی جی خالد خٹک کا تبادلہ ، مذاکرات کے عادی پولیس آفیسر سلطان اعظم تیموری کو نیا آئی جی اسلام آباد لگانے کی منظوری

بدھ 6 دسمبر 2017 22:03

اسلام آباد(اُردو پوائنٹ اخبار آن لائن۔ بدھ 6 دسمبر 2017ء)فیض آباد کے دھرنے کے خلاف آپریشن ناکامی پر پہلا آفٹر شاک آگیا۔ ایڈیشنل آئی جی خالد خٹک کو تبدیل کرتے ہوئے مذاکرات کے عادی پولیس آفیسر سلطان اعظم تیموری کو نیا آئی جی اسلام آباد لگانے کی منظوری دے دی گئی۔تفصیلات کے مطابق فیض آبا ددھرنے میں حکومتی ناکامی نے اپنے اثرات دیکھانا شروع کر دئیے ہیں ، ایڈیشنل آئی جی خالد خٹک کو تبدیل کرتے ہوئے اسٹیبلشمنٹ ڈویژن میں رپورٹ کرنے کے احکامات جاری کردئیے ہیں۔

ان کی جگہ پنجاب پولیس میں خدمات سرانجام دینے والے پولیس آفیسر سلطان اعظم تیموری کو نیا انسپکٹر جنرل آف اسلام آباد پولیس تعینات کر نے کی منظوری دے دی گئی ہے۔

(جاری ہے)

نئے آئی جی اسلام آباد پولیس آفیسر سلطان اعظم تیموری اس سے قبل گوجرانوالا میں بطور آر پی او فرائض سر انجام دے رہے تھے۔جبکہ سلطان اعظم تیموری اس سے قبل بھی اسلام آباد میں تعینات رہ چکے ہیں۔

انہوں نے اپنی سروس اے ایس پی سے ڈی آئی جی تک اسلام آباد میں کی ۔ اس حوالے سے انہوں نے اپنی ترقی رک جانے پر عدالت عظمیٰ سے رجوع کر کے اپنے حق میں فیصلہ بھی لیا۔دوسری جانب ایڈیشنل آئی جی خالد خٹک کو اس وقت عمہدے ک ا چارج دیا گیاتھا جب سابق آئی جی اسلام آباد پولیس طارق مسعود یٰسین کی خدمات پنجاب کے حوالے کی گئی تھیں ۔واضح رہے کہ لبیک یارسول ؐاللہ کے 22روزہ احتجاج کے بعد پولیس کے آپریشن میں ناکامی سے وزارت داخلہ ایڈیشنل آئی جی خالد خٹک سے ناخوش تھی ۔ آپریشن میں ناکامی کا تمام ملبہ پولیس پر ڈال دیا گیا ہے ، جس کے بعد اسلام آباد پولیس میں جلد مزید تبادلوں کا بھی امکان ہے ۔