اقلیتی برادریوں سے تعلق رکھنے والے 10ہزار سے زائد طلباء وطالبات کی درخواستیں موصول ہوئی ہیں،وزارت مذہبی امور

پیر 16 اکتوبر 2017 16:32

اسلام آباد ۔ (اُردو پوائنٹ اخبار آن لائن۔ منگل 17 اکتوبر 2017ء)وزارت مذہبی امور و بین المذاہب ہم آہنگی کو اقلیتی برادریوں سے تعلق رکھنے والے طلباء وطالبات کیلئے مختص وظائف کے ضمن میں 10ہزار سے زائد درخواستیں موصول ہوئی ہیں، یہ وظائف پرائمری سے لیکر اعلیٰ اورپیشہ وارانہ تعلیمی اداروں کے طلباء وطالبات کو دئیے جائیں گے۔

وزارت مذہبی امور و بین المذاہب ہم آہنگی کے اقلیتی ونگ کے ایک عہدیدار نے اے پی پی کو بتایا کہ وزارت نے اس سلسلے میں ا قلیتی برادریوں سے تعلق رکھنے والے طلباء وطالبات سے درخواستیں طلب کی تھیں اوراب تک مختلف کیٹیگریز میں 10 ہزار سے زائد طلباء وطالبات نے درخواستیں جمع کرائی ہیں ۔انہوں نے بتایا کہ ان درخواستوں کی سکروٹنی کا عمل جاری ہے اور سکروٹنی کے بعد مستحق طلباء و طالبات کو 60ہزار روپے سالانہ کی شرح سے وظائف دئیے جائیں گے، اس مقصد کیلئے مجموعی طورپر20.5 ملین روپے مختص کئے گئے ہیں۔

(جاری ہے)

ان وظائف کیلئے وضع کردہ طریقہ کار کے تحت ہندو، سکھ، مسیحی ، بدھ مت اوردیگر اقلیتی برادریوں سے تعلق رکھنے والے وہ طلباء وطالبات درخواست دینے کے اہل ہیں جنہوں نے اپنے آخری سالانہ امتحان میں کم سے کم 50 فیصد نمبرز حاصل کئے ہوں ، اسی طرح درخواست دینے والے طلباء و طالبات کے والدین کی ماہانہ آمدنی 10 ہزارروپے سے زائد نہیں ہونی چاہئیے، اعلی کلاسوں کیلئے درخواستیں دینے والے طلباء کے والدین کیلئے آمدنی کی حد 20 ہزارروپے مقرر کی گئی ہے۔