پی آئی اے کے ترجمان کی ادارے حوالے سے ذرائع ابلاغ میں شائع ہونے والی خبر کی تردید

خبر مکمل طور پر بے بنیاد اور ادارے کی ساکھ کونقصان پہچانے کے مترادف ہے

پیر 25 ستمبر 2017 21:28

اسلام آباد(اُردو پوائنٹ اخبارآن لائن۔26ستمبر ۔2017ء)پاکستان انٹرنیشنل ائر لائن( پی آئی ای) نے 23 ستمبر کو ذرائع ابلاغ میں شائع ہونے والی خبر کی تردید کی ہے جس میں کہا گیا ہے کہ برطانیہ میں ایک ہوٹل نے پی آئی اے عملے کو کمرے دینے سے انکار کر دیا۔یہ خبر پی آئی اے کی ساکھ کو نقصان پہنچانے کی ایک مذموم کوشش ہے۔ ترجمان نے کہا کہ یہ خبر مکمل طور پر بے بنیاد ہے اور اس کی وضاحت پڑھنے والوں کے لئے کی جارہی ہے۔

برمنگھم میں پی آئی اے کا ایک معیاری ہوٹل کے ساتھ ستمبر 2017 سے معاہدہ چل رہا ہے اور دونوں فریقوں کے درمیان تعلقات نہایت خوشگوار ہیں۔ مزید برآں پی آئی اے نے اس سے پہلے عارضی طور پر تین ماہ کے لئے ایک اور ہوٹل سے معاہدہ کیا تھا۔ قومی ائر لائن کے برطانیہ اور دنیا بھر میں بہترین ہوٹلز کے ساتھ معاہدے کامیابی سے چل رہے ہیں۔

(جاری ہے)

ترجمان نے بتایا کہ برمنگھم میں جس ہوٹل کے ساتھ معاہدہ چل رہا تھا جون میں اس ہوٹل کی بندش کے بعد پی آئی اے نے کیبن کریو کی رہائش کے لئے نئے ہوٹل کی تلاش شروع کر دی اور اس عرصے کے دوران عارضی طور پر جون سے اگست کے دوران ایک اور ہوٹل سے معاہدہ کیا جبکہ اس مختصر عرصے کے دوران ایئر لائن کی ضروریات کے مطابق ایک مشہور اور معیاری ہوٹل کے ساتھ طویل مدتی معا ہدہ طے پا گیا جو کہ کامیابی سے چل رہا ہے۔

یہ بات بھی قابل غور ہے کہ اگر پی آئی اے کا ایک ہوٹل کے ساتھ اچھا تجربہ نہ رہا ہوتا تو ایک اور بہتر ہوٹل پی آئی اے کے ساتھ معاہدہ کیوں کرتا۔ترجمان نے کہا کہ ذرائع ابلاغ اور خاص طور پر سوشل میڈیا میں اس بات کو بہت اچھالا گیا کہ برطانیہ میں ایک ہوٹل نے پی آئی اے کے عملے کو کمرے دینے سے انکار کر دیا۔ یہ بات نہایت نامناسب ہے کہ پی آئی اے ترجمان سے مذکورہ خبر کے حقائق کی تصدیق کے متعلق رابطہ کئے بغیر قومی ایئر لائن کو اس کا ذمہ دار ٹھہرا دیا گیا۔

اس خبر کو شائع کرنے سے پہلے پی آئی اے سے رابطہ کرنے کی کوشش نہیں کی گئی۔ترجمان نے مزید کہا کہ جہاں تک کسی مرد کریو ممبر کی جانب سے غیر اخلاقی حرکت کی بات ہے یہ بے بنیاد اور من گھڑت ہے۔ اس سلسلے میں مکمل تحقیقات کے بعد یہ بات سامنے آئی کہ پی آئی اے کے کسی کریو ممبر نے ایسی کوئی غیر اخلاقی حرکت نہیں کی بلکہ حقیقت میں یہ پی آئی اے کو بد نام کرنے کی کوشش ہے۔

Facebook Twitter Google + Share on Whatsapp

پی آئی اے کے ترجمان کی ادارے حوالے سے ذرائع ابلاغ میں شائع ہونے والی خبر کی تردید

خبر مکمل طور پر بے بنیاد اور ادارے کی ساکھ کونقصان پہچانے کے مترادف ہے

منگل 26 ستمبر 2017 کی مزید خبریں