وزیر خارجہ کیخلاف منی لانڈرنگ،اقامہ کی درخواست:اسلام آباد ہائی کورٹ نے لارجر بنچ تشکیل دے دیا

جسٹس عامر فاروق کی سربراہی میں تین رکنی بنچ جسٹس محسن اختر کیانی اور جسٹس گل حسن 26 ستمبر کو باقاعدہ سماعت کریگا

ہفتہ 23 ستمبر 2017 16:21

اسلام آباد (اُردو پوائنٹ اخبار آن لائن۔ اتوار 24 ستمبر 2017ء)چیف جسٹس اسلام آباد ہائی کورٹ نے وزیر خارجہ خواجہ آصف کیخلاف منی لانڈرنگ اور اقامہ کے حو الے سے دائر درخواست پر تین رکنی لارجر بنچ تشکیل دے دیا ۔26 ستمبر کو سماعت ہوگی ۔

(جاری ہے)

تفصیلات کے مطابق اسلام آباد ہائیکورٹ کے چیف جسٹس انور خان کاسی نے جسٹس عامر فاروق پرمشتمل سنگل رکنی بینچ کی جانب سے لارجر بینچ بنائے جانے کے حوالے سے بھیجی گئی سفارش پر جسٹس عامر فاروق کی سربراہی میں جسٹس محسن اختر کیانی اور جسٹس گل حسن اورنگزیب پر مشتمل لارجر بینچ تشکیل دے دیا ہے جو 26ستمبر سے باقاعدہ درخواست کی سماعت کریگا۔

واضح رہے وزیر خارجہ خواجہ آصف کے خلاف پی ٹی آئی کے رہنما عثمان ڈار نے اقامہ ظاہر نہ کرنے پر نااہلی کی درخواست دائر کر رکھی ہے جس میں موقف اختیار کیا گیا ہے کہ وزیر خارجہ خواجہ آصف منی لانڈرنگ میں بھی ملوث ہیں جس پر اسلام آباد ہائیکورٹ کے جسٹس عامر فاروق پر سنگل رکنی بینچ نے گزشتہ سماعت پر درخواست میں الیکشن لا اور آئینی نقطے اٹھائے جانے پر معاملہ چیف جسٹس اسلام آباد ہائیکورٹ کو واپس بھیجو ا دیا تھا اور لارجر بینچ تشکیل دینے کی سفارش کی تھی۔