پاکستان پھر سے پیٹرول کی قلت کے بحران کے دہانے پر

منگل 19 ستمبر 2017 19:27

اسلام آباد (اُردو پوائنٹ اخبار آن لائن۔ بدھ 20 ستمبر 2017ء) پاکستان پھر سے پیٹرول کی قلت کے بحران کے دہانے پر پہنچ گیا ہے۔ تفصیلات کے مطابق آئل اینڈ گیس ریگولیٹری اتھارٹی(اوگرا)نے ڈی جی آئل اور او سی اے سی کو خط کے ذریعہ آگاہ کیا ہے کہ پٹرول کا ذخیرہ قواعد کے تحت 20 دنوں کے بجائے صرف 7 دن کا رہ گیا ہے۔صنعتی ذرائع کے مطابق نجی آئل مارکیٹنگ کمپنیاں مارکیٹ میں اپنے شیئر زکے مطابق گزشتہ ماہ پٹرول درآمد کرنے میں ناکام ر ہیں جس سے پورا دبائو پی ایس او پر آگیا ہے۔

پی ایس او کے ترجمان کے مطابق بحران کے باوجود پٹرول کی فراہمی بحال رکھی گئی۔ او سی اے سی کے سی ای او نے اعتراف کیا کہ گزشتہ ماہ نجی آئل مارکیٹنگ کمپنیاں اپنے حصے کا پٹرول درآمد کرنے میں ناکام رہیں جس کی و جہ سے صورتحال بگڑ گئی۔

(جاری ہے)

انہوں نے یہ بھی بتایا کہ یہ نجی آئل مارکیٹنگ کمپنیاں چند دنوں میں آئل ٹینکرز منگوارہی ہیں جس سے صورتحال بہتر ہوگی اور دس روز کے لئے ذخیرہ دستیاب ہوجائے گا۔

گزشتہ دو ماہ سے پٹرول کی قلت کاسامنا ہے اور اگر کوئی کھیپ نہیں پہنچ پاتی تو پٹرول کی شدید قلت سے معمولات زندگی شدت سے متاثر ہوتی ہے۔آئل کمپنیز ایڈوائزری کونسل کے چیف ایگزیکٹو آفیسر ایم الیاس فاضل نے رابطہ کرنے پر بتایا کہ گزشتہ سال کے مقابلے میں پٹرول کی طلب میں 15 فیصد اضافہ ہوا۔ جس کی وجہ پٹرول کا سستا ہونا اور اقتصادی سرگرمیوں میں تیزی رہی تاہم انہوں نے بتایا کہ پٹرول کا ذخیرہ آئندہ دو دنوں میں 10 روز کی ضرورت کا ہوجائے گا۔