میانمار حکومت کو اپنے قانون نافذ کرنے والے اداروں کو روکنا چاہیے

مسلمانوں پر حملے نہیں ہونے چاہیے تھے،میانمار اپنے پناہ گزینوں کو واپس لے یہ ان کے اپنے لوگ ہیں ، روہنگیا جنگجوئوں کی کارروائیاں بھی قابل مذمت ہیں ، بنگالی صدر کا پناہ گزینوں کے کیمپ کا دورہ ، گفتگو

منگل 12 ستمبر 2017 23:13

ڈھاکہ (اُردو پوائنٹ اخبار آن لائن۔ بدھ 13 ستمبر 2017ء)بنگلہ دیش کی وزیرِ اعظم شیخ حسینہ واجد نے کہا ہے کہ میانمار حکومت کو اپنے قانون نافذ کرنے والے اداروں کو روہنگیا مسلمانوں پر حملے کرنے کی اجازت نہیں دینی چاہیے تھی۔انھوں نے برمی رہنما آنگ سان سو چی کو ایک ذاتی پیغام میں لکھا ہے کہ مینانمار کو پناہ گزینوں کو واپس لینا چاہیے کیونکہ وہ ان کے 'اپنے لوگ' ہیں۔

انھوں نے حالیہ تشدد کی لہر میں روہنگیا جنگجوؤں کے کردار کی بھی مذمت کی۔حالیہ ہفتوں میں تین لاکھ 70 ہزار سے زیادہ روہنگیا پناہ گزین سرحد عبور کر بنگلہ دیش آئے ہیں۔شیخ حسینہ نے منگل کے روز میانمارکی سرحد کے قریب روہنگیا پناہ گزینوں کے ایک کیمپ کا دورہ بھی کیا۔ انھوں نے اس موقعے پر کہا: 'انھیں اسے روکنا چاہیے، ساتھ ہی ساتھ میانمار کی حکومت کو تحمل سے اس صورتحال سے نمٹنا چاہیے، انھیں فوج یا اپنی ایجنسیوں کو اجازت نہیں دینی چاہیے کہ عام لوگوں پر حملہ کریں۔

(جاری ہے)

بچوں، خواتین اور معصوم لوگوں کا کیا قصور ہے۔ وہ اس کے ذمہ دار نہیں ہیں۔'ہمیں انھیں پناہ دینی ہے تاکہ وہ خوراک اور ادویات حاصل کر سکیں، جب تک وہ انھیں واپس لینے کے لیے تیار نہیں ہوتے۔ وہ انسان ہیں ہم انھیں واپس نہیں دھکیل سکتے۔ ہم ایسا نہیں کر سکتے۔ ہم انسان ہیں۔'بنگلہ دیشی وزیرِ اعظم نے کہا: 'ہم نے پارلیمنٹ میں ایک قرارداد منظور کی ہے کہ میانمار کی حکومت کو اپنے تمام شہریوں کو واپس اپنے ملک لے جانا چاہیے۔

اقوام متحدہ اور بین الاقوامی تنظیمیں میانمار پر ضابطے کے مطابق کارروائی کرنے اور انھیں واپس لینے کے لیے دباؤ ڈال رہی ہیں۔'میرا ذاتی پیغام بہت واضح ہے کہ انھیں انسانی بنیادوں پر صورت حال کو سمجھنا چاہیے کیونکہ یہ لوگ، بچے اور خواتین مشکل میں ہیں۔ ایک صدی سے زیادہ عرصے سے ان لوگوں کا میانمار سے تعلق ہے اور یہ وہاں مقیم رہے ہیں۔ یہ کیسے اس بات سے انکار کر سکتے ہیں کہ وہ ان کے شہری نہیں ہیں۔'میانمار کی فوج کا کہنا ہے کہ وہ جنگجوؤں کے خلاف لڑ رہی ہے اور اس بات کی تردید کرتی ہے کہ انھوں نے عام شہریوں کو نشانہ بنایا ہے۔تاہم وہاں سے آنے والوں میں بہت سے پناہ گزین کہتے ہیں کہ وہ میانمار کی فوج کے تشدد اور دیہات جلانے کے واقعات کی وجہ سے بھاگ کر آئے ہیں۔۔