آل پاکستان مسلم لیگ نے چترال سے پیپلز پارٹی کی اہم وکٹ اڑا لی

بلاول زرداری کے چترال سے نامزد امیدوار سلطان وزیر خان نے اے پی ایم ایل میں شمولیت کا اعلان کردیا تاریخ میں چترالی عوام کی سب سے زیادہ خدمت سید پرویز مشرف نے کی ہے،انہی کا مشن آگے بڑھائیں گے،سلطان وزیر خان

اتوار 28 مئی 2017 18:00

اسلام آباد(اُردو پوائنٹ اخبار آن لائن۔ پیر مئی ء)گزشتہ روز آل پاکستان مسلم لیگ کے مرکزی دفتر میں پیپلز پارٹی چترال کے اہم راہنما اور سابق بیوروکریٹ سلطان وزیرخان نے اے پی ایم ایل کے سیکرٹری جنرل ڈاکٹر محمد امجد سے ملاقات کی۔دوران ملاقات انہوں نے اے پی ایم ایل کے سربراہ سید پرویز مشرف سے ٹیلی فونک گفتگو کی اور آل پاکستان مسلم لیگ میں باقاعدہ شمولیت کا اعلان کردیا۔

بعد ازاں انہیں اے پی ایم ایل چترال کا صدر مقررکردیا گیا۔اس موقع پر آل پاکستان مسلم لیگ کے مرکزی نائب صدر محمد ریاض خان اور مرکزی چیف آرگنائزر سید فقیر حسین بخاری بھی موجود تھے۔واضح ہو کہ سلطان وزیر خان پیپلز پارٹی چترال کے اہم راہنما رہے ہیں جبکہ پیپلز پارٹی کے چیئرمین بلاول بھٹو زرداری نے بذات خود انہیں چترال سے امیدوار نامزد کیاتھا۔

(جاری ہے)

اے پی ایم ایل کے راہنمائوں نے انہیںپارٹی میں شمولیت پر خوش آمدید کہا اور امید ظاہر کی کہ ان کی شمولیت سے اے پی ایم ایل چترال مزید مضبوط،فعال اور منظم ہوگی۔پارٹی راہنمائوں سے گفتگو میں سلطان وزیر خان نے کہا کہ ملکی تاریخ میں چترالی عوام کے مسائل سب سے زیادہ سید پرویز مشرف نے حل کئے۔ چترالی عوام آج بھی انہیں یاد کرتے ہیں۔ لواری ٹنل علاقہ کے عوام کی بنیادی ضرورت تھی۔

تب چترال کے لوگ چھ چھ ماہ تک بیرونی دنیا سے منقطع رہتے تھے۔سید پرویز مشرف کو اس بات کا احساس ہوا اور انہوں نے اس منصوبے پر کام شروع کیاجو اب تکمیل کے آخری مراحل میں ہے۔انہوں نے کہا کہ گو کہ آج کے حکمران اس کا افتتاح کر کے اپنے نام کی تختی لگا رہے ہیں مگر چترالی عوام اچھی طرح یہ بات جانتے ہیں کہ لواری ٹنل سید پرویز مشرف کا کارنامہ ہے ۔

ان کا کہنا تھا کہ سید پرویز مشرف کے بعد آنے والے حکمرانوں نے چترالی عوام کو یکسر فراموش کردیا یہی وجہ ہے کہ انہوں نے سید پرویز مشرف کی قیادت پر اعتماد کا اظہار کرتے ہوئے آل پاکستان مسلم لیگ میں شمولیت کا اعلان کیا ہے۔انہوں نے کہا کہ وہ چترال کے گھرگھر میں اے پی ایم ایل کا پیغام پہنچائیں گے اور چترالی عوام ایک مرتبہ پھر سے کامیابی کا سہرا سید پرویز مشرف کے سر باندھیں گے ۔