سپریم کورٹ، جے آئی ٹی نے پاناما فیصلے پرعملدرآمد بارے پیشرفت رپورٹجمع کرادی

تحریک انصاف کی رپورٹ شیئر کرنے کی درخواست مسترد، مناسب وقت پر رپورٹ منظر عام پر لائی جائیگی ،ْعدالت عظمیٰ ایسا کوئی فوجداری مقدمہ بتا دیں جس میں دور ان تفتیش دستاویزات فریقین کے حوالے کر دی گئی ہوں ،ْ سپریم کورٹ ہمیں رپورٹ سے اختلافات نہیں ہے ،ْ ججز کا جے آئی ٹی کی رپورٹ پر اطمینان کا اظہار کسی صورت اضافی وقت نہیں دیا جائیگا ،تحقیقات 60 روز میں لازمی مکمل کریں ، کوئی ادارہ تعاون نہیں کررہا تو بتایا جائے ،عدالت اپنے حکم پر عملدر آمد کرانا جانتی ہے ،ْ ججز کے ریمارکس

پیر 22 مئی 2017 16:56

اسلام آباد (اُردو پوائنٹ اخبار آن لائن۔ منگل 23 مئی 2017ء)سپریم کورٹ آف پاکستان نے پاناما فیصلے پر عملدر آمد کیس کی سماعت کے دور ان تحریک انصاف کی جانب سے جے آئی ٹی کی رپورٹ شیئر کرنے کی درخواست مسترد کرتے ہوئے واضح کیا ہے کہ مناسب وقت پر رپورٹ منظر عام پر لائی جائیگی ،ْ ایسا کوئی فوجداری مقدمہ بتا دیں جس میں دور ان تفتیش دستاویزات فریقین کے حوالے کر دی گئی ہوں جبکہ ججزنے جے آئی ٹی کی رپورٹ پر اطمینان کا اظہار کرتے ہوئے کہاہے کہ ہمیں رپورٹ سے اختلافات نہیں ہے ،ْ اس بات کا خیال رکھا جائے کسی صورت اضافی وقت نہیں دیا جائیگا ،ْ تحقیقات 60 روز میں لازمی مکمل کریں ،ْ کوئی ادارہ تعاون نہیں کررہا ہے تو بتایا جائے عدالت اپنے حکم پر عملدر آمد کرانا جانتی ہے ۔

(جاری ہے)

پیر کو سپریم کورٹ آف پاکستان میں پاناما فیصلے پر عمل درآمد کیس کی سماعت ہوئی جس میں عدالت عظمیٰ کی جانب سے مزید تحقیقات کیلئے قائم کی جانے والی مشترکہ تحقیقاتی ٹیم (جے آئی ٹی) نے اب تک ہونے والی پیش رفت کی رپورٹ پیش کی۔جے آئی ٹی کی جانب سے سپریم کورٹ کے خصوصی بینچ کے سامنے 3 سربہمر لفافے پیش کیے گئے جن میں اب تک پاناما لیکس کے معاملے پر ہونے والی تحقیقات کی تفصیلات درج تھیں۔

ججز نے سربمہر لفافوں کو کھول کر رپورٹ پڑھی اور دوبارہ لفافوں کو بند کرکے ہدایت کی کہ انہیں رجسٹرار کے پاس جمع کرادیں۔جے آئی ٹی کی رپورٹ پڑھنے کے بعد جسٹس عظمت سعید نے کہا کہ ہم اس پر غیر مطمئن نہیں ہیں اور ہمیں رپورٹ سے اختلاف نہیں ہے۔اس موقع پر جسٹس اعجاز افضل نے کہا کہ ہم شہرت کیلئے قانون نہیں بیچتے۔پاکستان تحریک انصاف کی اعلیٰ قیادت بھی اس موقع پر عدالت میں موجود تھی ،ْپی ٹی آئی کی جانب سے فیصل چوہدری ایڈوکیٹ نے عدالت سے استدعا کی کہ جے آئی ٹی کی رپورٹ کو عام کیا جائے تاہم جسٹس اعجاز افضل نے ان کی استدعا مستردکرتے ہوئے کہا کہ مناسب وقت پر رپوٹ منظر عام پر لائی جائیگی ،ْ کوئی ایسا فوجداری مقدمہ بتادیں جس میں دوران تفتیش دستاویزات فریقین کے حوالے کردی گئی ہوں۔

سماعت کے دوران خصوصی بینچ کے رکن جسٹس عظمت سعید شیخ نے جے آئی ٹی کو واضح طور پر کہا کہ اس بات کا خیال رکھیں کہ کسی صورت اضافی وقت نہیں دیا جائیگا ،ْ تحقیقات 60 روز میں لازمی مکمل کریں۔جسٹس عظمت نے جے آئی ٹی ارکان سے کہا کہ اگر کسی ادارے سے کوئی مسئلہ ہے یا کوئی ادارہ تعاون نہیں کررہا تو بتایا جائے ،ْعدالت اپنے حکم پر عمل درآمد کرانا جانتی ہے۔

بعد ازاں سماعت 2 ہفتوں کے لیے ملتوی کردی گئی۔یاد رہے کہ گذشتہ ماہ 20 اپریل کو سپریم کورٹ نے پاناما لیکس کیس کے تاریخی فیصلے میں وزیراعظم نواز شریف کے خلاف مزید تحقیقات کیلئے فیڈرل انویسٹی گیشن ایجنسی (ایف آئی ای) کے اعلیٰ افسر کی سربراہی میں مشترکہ تحقیقاتی ٹیم (جے آئی ٹی) بنانے کا حکم دیا تھا۔فیصلے میں کہا گیا تھا کہ ایف آئی اے کے سینئر ڈائریکٹر کی سربراہی میں جے آئی ٹی تشکیل دی جائیگی جو 2 ماہ میں اپنی تحقیقات مکمل کریگی ،ْ جبکہ جے آئی ٹی کو ہر 2 ہفتے بعد سپریم کورٹ کے بینچ کے سامنے اپنی رپورٹ پیش کرنے کی بھی ہدایت کی گئی تھی ،ْاس کے بعد 6 مئی کو سپریم کورٹ کے جسٹس اعجاز افضل خان، جسٹس شیخ عظمت سعید اور جسٹس اعجاز الحسن پر مشتمل تین رکنی خصوصی بینچ نے جے آئی ٹی میں شامل اراکین کے ناموں کا اعلان کیا تھا۔

جے آئی ٹی کا سربراہ وفاقی تحقیقاتی ادارے (ایف آئی ای) کے ایڈیشنل ڈائریکٹر جنرل واجد ضیاء کو مقرر کیا گیاتھا ۔