پارٹی رہنما زیادہ سے زیادہ وقت اپنے حلقے کے عوام کو دیں، آئندہ انتخابات کیلئے بھرپور تیاری کریں،خیبرپختونخوا کا دورہ کرنے والاہوں، ہر کارکن سے ملاقات کرونگا

پیپلزپارٹی پارلیمنٹیرینز کے صدر آصف زرداری کی پی پی خیبرپختونخوا کے نئے عہدیداروں اور رہنمائوں سے ملاقات میں گفتگو

بدھ 12 اپریل 2017 23:02

اسلام آباد(اُردو پوائنٹ اخبار آن لائن۔ جمعرات 13 اپریل 2017ء) پاکستان پیپلزپارٹی پارلیمنٹیرینز کے صدر آصف علی زرداری نے پارٹی رہنمائوں کو ہدایت کی ہے کہ و ہ زیادہ سے زیادہ وقت اپنے حلقے کے عوام کو دیں اور آئندہ انتخابات کے لئے بھرپور تیاری کریں،خیبرپختونخوا کا دورہ کرنے والاہوں، وہاں ہر کارکن سے ملاقات کریں گے ۔

وہ بدھ کو یہاں زرداری ہائوس اسلام آباد میں پاکستان پیپلزپارٹی خیبرپختونخوا کے نئے منتخب عہدیداروں اور رہنمائوں سے ملاقات کے دوران گفتگو کررہے تھے ۔ وفد کی قیادت صوبائی صدر ہمایوں خان نے کی۔ فخرزمان قادر، نگہت اورکرزئی، صاحبزادہ ثنااللہ، سلیم خان، سردار حسین، محمد علی شاہ باچا وفد میں شامل تھے۔ ملاقات میں خیبرپختونخوا کی سیاسی صورتحال اور تنظیمی امور پر تبادلہ خیال کیا گیا۔

(جاری ہے)

اس موقع پر آصف علی زرداری نے پارٹی رہنمائوں کو ہدایت کی کہ زیادہ سے زیادہ وقت اپنے حلقے کے عوام کو دیں اور آئندہ انتخابات کے لئے بھرپور تیاری کریں۔ سابق صدر نے کہاکہ وہ خیبرپختونخوا کا دورہ کرنے والے ہیں اور وہاں ہر کارکن سے ملاقات کریں گے۔ انہوں پارٹی رہنمائوں سے کہا کہ وہ چیئرمین بلاول بھٹو زرداری کے ہاتھ مضبوط کریں اور ان کی طاقت بنیں۔ سابق صدر نے کہا کہ پاکستان پیپلزپارٹی کی سابقہ حکومت نے خیبرپختونخواہ کے عوام کو شناخت دی۔ پیپلزپارٹی دوبارہ اقتدار میں آکر خیبرپختونخوا کے عوام کے بنیادی مسائل حل کرے گی۔ اس موقع پر سینیٹر سردار علی خان بھی موجود تھے۔