نوازشریف اور شہبازشریف پاکستان کیساتھ وفا کرنیوالے حکمران ہیں:امام کعبہ

نواز شریف اور شہبازشریف ہمارے بھائی ہیں،دونوں پاکستانی عوام کی دل کیساتھ خدمت کررہے ہیں پاکستان کے عوام جان چکے ہیں کہ کون انہیں فائدہ پہنچاتا ہے اور کس نے انہیں نقصان پہنچایا ہے ہمیں نوازشریف اورشہبازشریف کی قیادت پر فخر ہے کہ وہ حقیقی معنوں میں عوام کی خدمت کررہے ہیں لاہور کو ترقی یافتہ شہر بنانے پر شہبازشریف کی تعریف،وزیراعلیٰ کی امام کعبہ سے عربی زبان میں گفتگو

پیر 10 اپریل 2017 11:28

لاہور( اُردو پوائنٹ اخبارآن لائن۔10اپریل ۔2017ء)وزیراعلیٰ پنجاب محمد شہبازشریف نے امام کعبہ الشیخ صالح محمد بن طالب سے عربی زبان میں گفتگو کی ،امام کعبہ نے وزیراعلیٰ شہبازشریف کی عربی زبان پر دسترس کی تعریف کی - امام کعبہ الشیخ صالح محمد بن طالب نے وزیراعلیٰ پنجاب محمد شہبازشریف سے ملاقات کے دوران گفتگو کرتے ہوئے کہا کہ وزیراعظم محمد نوازشریف اوروزیراعلیٰ پنجاب محمد شہبازشریف پاکستان کیساتھ وفا کرنیوالے حکمران ہیں اوریہ پاکستان کے عوام کی دل کیساتھ خدمت کررہے ہیں ۔

پاکستان کے عوام جان چکے ہیں کہ کون انہیں فائدہ پہنچاتا ہے اور کس نے انہیں نقصان پہنچایا ہے۔انہوں نے کہا کہ وزیراعظم محمد نوازشریف اور وزیراعلیٰ پنجاب محمد شہبازشریف ہمارے بھائی ہیں اورہمیں ان کی قیادت پر فخر ہے کہ وہ پاکستانی عوام کی حقیقی معنوں میں خدمت کررہے ہیں ۔

(جاری ہے)

اللہ تعالیٰ شریف خاندان پر اپنی برکتیں اوررحمتیں نازل کریں ۔

امام کعبہ نے کہا کہ محمد نوازشریف اورمحمد شہباز شریف عوام کی خدمت کر کے نیک عمل کررہے ہیں اورمیں سمجھتا ہوں کہ آپ کا اچھا عمل کبھی ضائع نہیں ہوتا۔ امام کعبہ نے لاہور کی ترقی کی تعریف کرتے ہوئے کہا کہ اگرچہ لاہور ایک تاریخی اور ثقافتی شہر ہے لیکن جب میں ائیرپورٹ سے ماڈل ٹاوٴن آرہا تھا تو میں نے دیکھا کہ اس تاریخی شہر کو بڑی خوبصورتی اورمنصوبہ بندی کے ساتھ حسین بنایا گیاہے اوریہ تاریخی شہر ایک ترقی یافتہ شہر کا روپ دھار چکا ہے جس کا کریڈٹ وزیراعلیٰ شہبازشریف کو جاتا ہے جبکہ اسلام آباد کا شہر مکمل منصوبہ بندی کیساتھ بنایاگیا ہے لیکن پرانے شہر کو اس طرح خوبصورت بنانا یقینا شہبازشریف کا کارنامہ ہے اور یہ ایک محنت طلب کام ہے جس پر وہ مبارکباد کے مستحق ہیں۔

امام کعبہ نے نماز عصرکی امامت ماڈل ٹاوٴن میں کرائی۔وزیراعلیٰ پنجاب محمد شہبازشریف ،علمائے کرام اور دیگر افراد نے امام کعبہ کی امامت میں نماز عصر ادا کی ۔نماز عصر کی ادائیگی کے بعدپاکستان کی ترقی اور خوشحالی اورامت مسلمہ کے اتحادکیلئے خصوصی دعا کی گئی۔