کراچی:سندھ کابینہ نے آئی جی سندھ اے ڈی خواجہ کی خدمات وفاق کے سپرد کرنے کی منظوری دیدی

وزراء کا نواز شریف اور عمران خان پراے ڈی خواجہ کو استعمال کرنے کا الزام عائد ،اجلاس کی اندرونی کہانی آئینی اختیارہے کسی بھی افسرکوتبدیل کرسکتاہوں،وزیر اعلی سندھ

بدھ 5 اپریل 2017 21:55

کراچی(اُردو پوائنٹ اخبار آن لائن۔ جمعرات 6 اپریل 2017ء)سندھ کابینہ نے آئی جی سندھ اے ڈی خواجہ کی خدمات وفاق کے سپرد کرنے کی منظوری دیدی ہے تاہم کابینہ اجلاس کی اندرونی کہانی کے حوالے سے ذرائع کا کہنا ہے کہ وزراء نے نواز شریف اور عمران خان پراے ڈی خواجہ کو استعمال کرنے کا الزام عائد کیا ہے ۔بد ھ کو نیو سندھ سیکرٹریٹ میںوزیراعلیٰ سندھ سید مراد علی شاہ کی صدارت میں سندھ کابینہ کا ہنگامی اجلاس ہوا، اجلاس میںآئی جی سندھ اے ڈی خواجہ سے متعلق سندھ ہائی کورٹ کے احکامات کے حوالیس ے بریفنگ دی گئی جبکہ آئی جی سندھ اے ڈی خواجہ کی خدمات وفاق کے سپرد کرنے اور کسی بھی نئے افسر کو آئی جی سندھ بنانے کی منظوری دیدی۔

ذرائع نے بتایا کہ سندھ کابینہ نے بغیر کسی توجہی کے آئی جی سندھ اے ڈی خواجہ کوخدمات وفاق کے سپرد کرنے کی منظوری دی۔

(جاری ہے)

کابینہ اجلاس کی اندرونی کہانی کے حوالے سے ذرائع نے بتایا کہ وزیر اعلیٰ سندھ سید مراد علی شاہ کا کہنا تھا کہ آئینی اختیارہے کسی بھی افسرکوتبدیل کرسکتاہوں۔اجلاس کے دوران ایک صوبائی وزیر کا کہنا تھا کہ اے ڈی خواجہ لیگی کارکن بن کرحکومت کوبدنام کررہے ہیں،نوازشریف سندھ میں ناکامی پراے ڈی خواجہ کواستعمال کررہے ہیں۔

ذرائع نے مزید بتایا کہ اجلاس کے دوران کابینہ ارکان کا کہنا تھا کہ وفاق کواے ڈی خواجہ اتنے پسند ہیں توانکوآئی جی پنجاب لگالیں۔اے ڈی خواجہ نے پوراسال کچھ کیا نہ کسی افسرکوکرنے دیا،ایڈی خواجہ نے محکمے کوتباہ کرنیکی سازش کی، اے ڈی خواجہ کے حق میںعمران خان کی حمایت سے ظاہرہوگیااے ڈی خواجہ ایجنڈے پرکام کررہے ہیں۔خیال رہے کہ دو روز قبل سندھ حکومت نے آئی جی سندھ اے ڈی خواجہ کی خدمات وفاق کے سپرد کرتے ہوئے نئے آئی جی سندھ کے لیے تین نام سردار عبدالمجید دستی ، غلام قادر تھیبواور خادم حسین بھٹی کے نام ارسال کیے تھے جن کی منظوری سے قبل ہی سردار عبدالمجید دستی کو قائم مقام آئی جی سندھ تعینات کردیا گیا تھا ۔

تاہم سندھ ہائی کورٹ کے حکم امتناع کے باعث سردار عبدالمجید دستی کو فوری طور پر عہدہ چھوڑنا پڑا اور اے ڈی خواجہ سے منگل کو ایک بار پھر آئی جی سندھ کے فرائض انجام دینا شروع کردیئے تھے ۔#