پاک فوج کا ملک بھر میں آپریشن ’’ردالفساد‘‘ شروع کرنے کا اعلان

ردالفساد آپریشن نیشنل ایکشن پلان کا حصہ اوراسکا مقصد سرحدی سلامتی کو یقینی بنانا ہے ،نیشنل ایکشن پلان پر عمل درآمد اس آپریشن کا طرہ امتیاز ہوگا ،آپریشن کا مقصد ملک بھر میں دہشت گردی کا بلا امتیاز خاتمہ ہے ، ملک کو دھماکہ خیز مواد اور غیر قانونی اسلحے سے پاک کیا جائے گا ، ایئر فورس، نیوی ، سول آرمڈ فورسز اور دیگر سیکیورٹی اور قانون نافذ کرنے والے ادارے ملک سے دہشت گردی کے ناسور کو ختم کرنے کیلئے اپنی کوششیں بھرپور طریقے سے جاری رکھیں گے ، پنجاب میں انسداد دہشت گردی کے لئے رینجرز بڑے پیمانے پر کاروائی کرے گی آرمی چیف جنرل قمر جاوید باجوہ کی زیر صدارت اعلیٰ سطح سیکیورٹی اجلاس میں فیصلے

بدھ 22 فروری 2017 19:01

راولپنڈی(اُردو پوائنٹ اخبار آن لائن۔ جمعرات 23 فروری 2017ء)پاک فوج نے ملکی سلامتی کو یقینی بنانے اور اسے اسلحہ وگولہ بارود سے پاک کرنے ا ور دہشتگردی کے بلاامتیاز خاتمے کیلئے ملک بھر میں آپریشن ’’ردالفساد‘‘شروع کرنے کا اعلان کردیا ۔بدھ کو پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت اعلیٰ سطح سیکیورٹی اجلاس ہوا جس میں اہم فیصلے کئے گئے ، پاک فوج نے ملک بھر میں آپریشن ’’ردالفساد‘‘آپریشن شروع کردیا ہے ۔

ردالفساد آپریشن نیشنل ایکشن پلان کا حصہ ہے ۔آپریشن کا مقصد سرحدی سلامتی کو یقینی بنانا ہے ۔ آئی ایس پی آر کے مطابق آپریشن کا مقصد ملک بھر میں دہشت گردی کا بلا امتیاز خاتمہ ہے ۔

(جاری ہے)

۔ نیشنل ایکشن پلان پر عمل درآمد اس آپریشن کا طرہ امتیاز ہوگا ۔آپریشن کا مقصد کامیابیوں کو مستحکم کرنا ہے ۔آئی ایس پی آر کے مطابق پاکستان ایئر فورس، پاکستان نیوی ، سول آرمڈ فورسز اور دیگر سیکیورٹی اور قانون نافذ کرنے والے ادارے ملک سے دہشت گردی کے ناسور کو ختم کرنے کیلئے اپنی کوششیں بھرپور طریقے سے جاری رکھیں گے ۔

آئی ایس پی آر کے مطابق پنجاب میں انسداد دہشت گردی کے لئے رینجرز بڑے پیمانے پر کاروائی کرے گی ۔ملک بھر میں انسداد دہشت گردی کے آپریشن جاری رہیں گے ۔ بلاامتیاز آپریشن سے شدت پسندی اور دہشت گردی کے خطرے کو ختم کیا جائے گا ۔ آئی ایس پی آر کے مطابق ملک کو دھماکہ خیز مواد اور غیر قانونی اسلحے سے پاک کیا جائے گا ۔ اجلاس میں صوبہ پنجاب کے تمام کورکمانڈرز نے شرکت کی ۔