طیبہ تشدد کیس :بچی کے والدین نے سیشن جج اور اس کی اہلیہ کو معاف کر دیا

سپریم کورٹ میں سماعت کے دوران دبائو میں آنے کا اعتراف ، اب پورے ہوش و حواس میں دونوں کو معاف کر رہا ہوں :اعظم کا بیان

جمعہ 10 فروری 2017 12:05

اسلام آباد(اُردو پوائنٹ اخبارتازہ ترین۔ 10 فروری2017ء)طیبہ تشدد کیس میں نیا موڑ ، بچی کے والد نے ایک بار پھر سیشن جج اور اس کی اہلیہ کو معاف کر دیا۔ سپریم کورٹ میں دبائو میں آجانے کا اعتراف ، سیشن جج نے تحریری بیان مانگ لیا۔ اسلام آباد کے ایڈیشنل سیشن جج راجہ آصف محمود نے طیبہ تشدد کیس کی سماعت کی۔ عبوری ضمانت کیلئے ملزم سیشن جج راجہ خرم بھی عدالت میں موجود تھے۔

عدالت نے گزشتہ سماعت پر طیبہ کے والدین کو بھی طلب کر رکھا تھا تاہم عدالت میں صرف طیبہ کا والد اعظم پیش ہوا۔ عدالت کے استفسار پر اعظم نے بتایا کہ طیبہ کی والدہ علالت کے باعث حاضر نہ ہوسکیں تاہم انہوں نے ایڈیشنل سیشن جج اور ان کی اہلیہ کو معاف کر دیا ہے۔ دونوں کے خلاف مقدمہ بے بنیاد ہے ، اگر ملزمان کو ضمانت دے دی جائے تو انہیں کوئی اعتراض نہیں۔

(جاری ہے)

اس پر ایڈیشنل سیشن جج راجہ آصف نے ریمارکس دیئے کہ گھبرانے کی کوئی بات نہیں ، مگر آپ پہلے بھی اس عدالت میں معافی کا بیان دیکر سپریم کورٹ میں مکر گئے تھے۔ اس پر اعظم نے کہا کہ وہ سپریم کورٹ میں سماعت کے دوران دبائو میں آگیا تھا ، تاہم اب وہ پورے ہوش و حواس میں راجہ خرم اور ان کی اہلیہ کو معاف کر رہے ہیں،عدالت نے ریمارکس دئیے کہ ملزم کی ضمانت کا فیصلہ ابھی نہیں ہوا۔مدعی کی مرضی سیبیان حلفی عدالت میں جمع کرائیں،تب ضمانت پرفیصلہ دیاجائیگا۔