پاکستان کی روس سے تربیتی طیارے یاک 130 کی خریدار ی میں دلچسپی ، پاک فضائیہ یاک 120 میں دلچسپی رکھتی ہے اس میں ایف سولہ اور جے ایف تھنڈر جیسے جنگی طیاروں کی ملتی جلتی منفرد خصوصیات ہیں، رپو رٹ

ہفتہ 22 اگست 2015 08:53

اسلا م آ با د( اُردو پوائنٹ اخبارآن لائن۔22اگست۔2015ء )چارایم آئی35 جنگی ہیلی کاپٹروں کے معاہدے کے بعد پاکستان اب روس سے تربیتی طیارے یاک 130 کی خریدار ی میں دلچسپی رکھتا ہے۔ دفاعی نیوز سائیٹ”ڈیفنس ورلڈ“ کے مطابق اگرچہ پاک فضائیہ (پی اے ایف) امریکی ایف سولہ اور چینی جے ایف تھنڈر جیسے جدید جنگی طیاروں کو آپریٹ کرتی ہے مگر ان کے پاس جدید جنگی تربیتی طیارے نہیں ہیں۔

انڈسٹری ذرائع نے دفاعی نیوز سائٹ کو بتایا کہ پاک فضائیہ کے حکام اسلحے کی کئی نمائشوں کے موقعوں پر یاک 130بنانے والی کمپنی روزوبورن ایکسپورٹ اور ارکٹ کے ایگزیکٹوزے بات چیت کرتے رہے ہیں۔تاہم آزادانہ ذارئع سے ان طیاروں کی خریداری کے متعلق بات چیت کی تصدیق نہیں کی جاسکی۔پاک فضائیہ کے پاس لڑاکا طیاروں کے پائلٹوں کی تربیت کے لئے اعلی درجے کے جیٹ ٹرینر نہیں ہیں۔

(جاری ہے)

ایک بنیادی ٹرینر طیارہ سپر مشاق ہے جو پاکستان اور چین کی شراکت سے تیار کیا گیا جب کہ درمیانے لیول کی تربیت کے لئے ” کے 8قراقرم“ اور” سیسنا ٹی17“ ٹرینرز طیارے موجودہیں۔ذرائع کا کہنا ہے کہ پاک فضائیہ یاک 120 میں دلچسپی رکھتی ہے اس میں ایف سولہ اور جے ایف تھنڈر جیسے جنگی طیاروں کی ملتی جلتی منفرد خصوصیات ہیں اور اس کے ذریعے ایک تربیتی پائلٹ جلد جدید جنگی طیارے کو اڑا سکتا ہے۔

گزشتہ برسوں میں روزوبورن ایکسپورٹ نے پاکستان کو مذکورہ ٹرینر طیاروں کی فروخت میں اس لئے بھی دلچسپی کا اظہار نہیں کیا کہ ایک تو روس کیلئے بھارت اسلحے کی بڑی مارکیٹ تھا جب کہ دوسرا خدشہ یہ تھا کہ ان طیاروں کا ڈیزائن اور خصوصیات چینی طیارہ سازوں کے ہاتھ نہ آجائے۔تاہم بھارت کی طرف سے دفاعی سازوسامان کی طلب میں کمی اور مشرق وسطیٰ کے روایتی خریدار لیبیا اور شام جیسے ممالک بحران کا شکار ہوگئے اس لئے روس متبادل منڈیوں کی تلاش پر مجبور ہے۔