مائنس الطاف کی بھی سازشیں ہو ئیں توہر گلی کوچے میں جنگ ہوگی ،ایم کیو ایم کو ملک دشمن قرار دیکرمجھے ہٹانے کی کوشش کی جارہی ہے،بغیر ثبوت الزام لگانے والے خود اندرونی اور بیرونی ایجنٹ ہیں،ایم کیو ایم کے قائد الطاف حسین کاکارکنوں سے ٹیلی فونک خطاب

منگل 30 جون 2015 09:07

لندن (اُردو پوائنٹ اخبارآن لائن۔30 جون۔2015ء)الطاف حسین ایم کیو ایم کے قائد الطاف حسین نے کہا ہے کہ حلفیہ کہتا ہوں کہ میرا ’’را‘‘ سے کوئی تعلق نہیں اور ’’را‘‘ ملک دشمن ایجنسی ہے جس سے لڑنے کے لیے ایم کیو ایم کے تمام کارکنان فوج کے شانہ بشانہ کھڑے ہوں گے۔الطاف حسین نے کہاہے کہ ایم کیو ایم کو ملک دشمن جماعت قرار دیا جارہا ہے اور مجھے ہٹانے کی کوششیں کی جارہی ہے ، مائنس الطاف کی بھی سازشیں ہورہی ہیں اور اگر ایسا ہوا توہر گلی کوچے میں جنگ ہوگی اور ایم کیو ایم بھی ٹکڑوں میں بٹ جائے گی۔

وہ پیر کو کراچی کے لال قلعہ گراؤنڈ میں پارٹی عہدیداروں اور کارکنوں سے ٹیلی فونک خطاب کر رہے تھے ۔ الطاف حسین نے کہا کہ ایم کیو ایم کو ملک دشمن جماعت قرار دیا جارہا ہے اور مجھے ہٹانے کی کوششیں کی جارہی ہے جب کہ مائنس الطاف کی بھی سازشیں ہورہی ہیں اور اگر ایسا ہوا توہر گلی کوچے میں جنگ ہوگی اور ایم کیو ایم بھی ٹکڑوں میں بٹ جائے گی۔

(جاری ہے)

الطاف حسین نے کہا کہ کچھ لوگ خود ساختہ بیان جاری کرکے لوگوں کو ایم کیو ایم سے متنفر کررہے ہیں جب کہ بغیر ثبوت الزام لگانے والے خود اندرونی اور بیرونی ایجنٹ ہیں، پاکستان بننے سے پہلے بھی تعصب تھا اور اس کے بعد بھی مہاجروں پر تعلیم کے دروازے بند کردیئے گئے تھے۔ انہوں نے کہا کہ پاکستان میں تمام صوبے لسانی بنیادوں پر بنائے گئے، سندھ کوٹا سسٹم بھی ختم کیا جائے۔