القاعدہ برطانیہ میں حملے کی منصوبہ بندی کر رہی ہے، برطانوی خفیہ ایجنسی ،حالیہ ..
تازہ ترین : 1

القاعدہ برطانیہ میں حملے کی منصوبہ بندی کر رہی ہے، برطانوی خفیہ ایجنسی ،حالیہ مہینوں میں3 منصوبے ناکام بنائے گئے، شام میں القاعدہ کی برانچ حملے کی منصوبہ بندی کررہی ہے،سربراہ ایم آئی فائیو

لندن (اُردو پوائنٹ اخبارآن لائن۔10 جنوری۔2015ء)برطانوی خفیہ ایجنسی کے سربراہ نے انکشاف کیا ہے کہ القاعدہ تنظیم برطانیہ میں پیرس طرز کے حملے کی منصوبہ بندی کر رہی ہے۔ ان کا کہنا ہے کہ حالیہ مہینوں میں3 منصوبے ناکام بنائے گئے ہیں۔برطانوی اخبار کے مطابق ایم آئی فائیو کے ڈائریکٹر جنرل اینڈریو پارکر کا کہنا ہے کہ القاعدہ کی جانب سے برطانیہ میں حملے کے خطرات بڑھتے جارہے ہیں۔

حالیہ مہینوں میں دہشت گردی کے3 منصوبے ناکام بنائے گئے ہیں تاہم کوئی منصوبہ کامیاب ہونے کا امکان مسترد نہیں کیا جاسکتا۔ انہوں نے کہا کہ شام میں القاعدہ کی برانچ حملے کی منصوبہ بندی کررہی ہے جس میں عراق اور شام سے واپس آنے والے برطانوی شدت پسندوں کو استعمال کیا جاسکتا ہے۔ ایم آئی فائیو کے سربراہ نے کہا کہ دہشت گرد منصوبوں میں مسافر طیارے کو اڑانے، ممبئی حملے کی طرز پر پْر ہجوم مقامات پر فائرنگ یا گاڑیوں کے ذریعے ٹارگٹڈ کارروائیاں شامل ہیں۔

برطانوی میڈیا کے مطابق دہشت گردی کے خطرے کے پیش نظر بندرگاہوں پر سیکیورٹی سخت کردی گئی، لندن کے سینٹ pancras اسٹیشن کے یورواسٹار ٹرمینل پر پولیس کا گشت بھی بڑھادیا گیا ہے۔ ایم آئی فائیو کے اہل کاروں نے مشتبہ برطانوی شدت پسندوں کی نگرانی بھی شروع کردی ہے۔

وقت اشاعت : 10/01/2015 - 08:43:02

متعلقہ عنوان :

اپنی رائے کا اظہار کریں