خیبر پختونخوا اسمبلی میں چار بل پیش کئے گئے جبکہ تین قراردادوں کو متفقہ طور پر منظوری دیدی گئی
پشاور(اُردو پوائنٹ اخبارآن لائن۔7 جنوری۔2015ء)خیبر پختونخوا اسمبلی میں چار بل پیش کئے گئے جبکہ تین قراردادوں کو متفقہ طور پر منظوری دیدی گئی۔پیرکے روزخیبر پختونخوا اسمبلی اجلاس میں سپیکر و ڈپٹی سپیکر کی مراعات ہیلتھ کیئر کمیشن بل 2015ء میڈیکل ٹیچنگ انسٹی ٹیوٹ ریفارمز بل 2015ء اورحساس اور غیر محفوظ مقامات کی سکیورٹی سے متعلق بل 2015ء سمیت چار بل اسمبلی میں پیش کئے گئے جن میں سے سپیکر اور ڈپٹی سپیکر کی مراعات اور حساس و غیر محفوظ مقامات کی سکیورٹی سے متعلق بل متفقہ طورپر منظور کر لئے گئے اوراب سپیکر اور ڈپٹی سپیکر صوبائی اسمبلی اپنے گھروں کی تعمیر و مرمت پر ایک لاکھ کی بجائے دس لاکھ روپے سالانہ خرچ کر سکتے ہیں اسی طرح حساس اور غیر محفوظ مقامات کی سکیورٹی سے متعلق بل میں مساجد اور مذہبی مقامات کو حساس مقامات سے نکالا گیا ہے اس سے متعلق ترمیم جے یو آئی کے مفتی فضل غفور نے پیش کی جبکہ خیبر پختونخوا اسمبلی کے اجلاس کے دوران تحریک انصاف کے رکن صوبائی اسمبلی اور وزیراعلیٰ کے مشیر قاسم خٹک نے پیش کرتے ہوئے کہا کہ ملک کے آئین کے آرٹیکل 158 کے تحت قدرتی گیس جس علاقے میں واقع ہو گی اس سے سب سے پہلے علاقے یا صوبے کی ضروریات پوری کی جائیں گی لیکن حال ہی میں سوئی نادرن گیس نے کرک اور کوہاٹ سے ہوتا ہوا براہ راست فیصل آباد اور پنجاب کے دیگر شہروں تک بڑی پائپ لائن بچھانے کا آغاز کیاہے سوئی نادرن گیس کا یہ اقدام آئین پاکستان کی خلاف ورزی اور خیبر پختونخوا کے عوام کے ساتھ ناانصافی اوربدنیتی پر مبنی ہے جس کی وجہ سے صوبے میں خصوصاً ضلع کرک اور کوہاٹ کے عوام میں بے چینی پیدا ہو گئی ہے اس لئے صوبائی اسمبلی وفاق سے سفارش کرتی ہے کہ آئین کی اصل روح کے مطابق ترجیحاً ضلع کرک کوہاٹ سمیت خیبر پختونخوا کے دیگر اضلاع کو پہلے قدرتی گیس مہیا کی جائے اور تاوقت مذکورہ پائپ لائن جو فیصل آباد اور پنجاب کے دیگر علاقوں کو بچھائی جا رہی ہے اس پر کام فی الفور بند کیا جائے اور خیبر پختونخوا کی ضروریات پوری ہونے کے بعد باقی گیس دیگر صوبوں کو دی جائے صوبائی اسمبلی نے پی پی کے پارلیمانی لیڈر محمد علی شاہ باچا کی قرارداد بھی متفقہ طور پر منظور کی جس میں کہا گیا تھا کہ ملاکنڈ ڈویژن ٹیکس فری زون ہے اور وہاں پر کسی قسم کے ٹیکس لاگو نہیں ہوتے لیکن موبائل کمپنیاں ملاکنڈ ڈویژن میں موبائل کارڈ لوڈ ہونے پر تقریباً پچیس روپے ٹیکس وصول کر رہی ہیں اس لئے صوبائی اسمبلی سفارش کرتی ہے کہ ملاکنڈ ڈویژن میں موبائل فون کارڈ لوڈ کرنے پر ٹیکس ختم کیا جائے۔
(جاری ہے)
مزید متعلقہ خبریں پڑھئیے :
متعلقہ عنوان :
