پاک فوج کے 6 میجر جنرلز کو لیفٹیننٹ جنرل کے عہدوں پر ترقی دیدی گئی،سابق ڈی جی رینجرز سندھ لیفٹیننٹ جنرل رضوان اختر نئے ڈی جی آئی ایس آئی مقرر ،ترقی پانے والوں میں میجر جنرل رضوان اختر، میجر جنرل ہلال حسین، میجر جنرل غیور محمود، میجر جنرل نذیر بٹ، میجر جنرل نوید مختار اور میجر جنرل ہدایت الرحمان شامل

منگل 23 ستمبر 2014 04:01

راولپنڈی (اُردو پوائنٹ اخبار آن لائن۔23ستمبر۔2014ء)پاک فوج کے 6 میجر جنرلز کو لیفٹیننٹ جنرل کے عہدوں پر ترقی دے دی گئی ۔سابق ڈی جی رینجرز سندھ لیفٹیننٹ جنرل رضوان اختر کو نیا ڈی جی آئی ایس آئی مقرر کر دیا گیا ۔پاک فوج کے شعبہ تعلقات عامہ آئی ایس پی آر کے مطابق میجر جنرل رضوان اختر کو لیفٹیننٹ جنرل کے عہدے پر ترقی دے کر آئی ایس آئی کا نیا سربراہ مقرر کردیا گیا ہے تاہم وہ لیفٹیننٹ جنرل ظہیرالاسلام کی ریٹائرمنٹ کے بعد اپنی ذمہ داریاں سنبھالیں گے۔

سماجی رابطے کی ویب سائٹ پر اپنے ایک پیغام میں ڈی جی آئی ایس پی آر میجر جنرل عاصم سلیم باجوہ نے کہا ہے کہ پاک فوج کے 6 میجر جنرلز کو لیفٹیننٹ جنرل کے عہدوں پر ترقی دے دی گئی ہے، جن افسران کو اگلے عہدوں پر ترقی دی گئی ہے ان میں میجر جنرل رضوان اختر، میجر جنرل ہلال حسین، میجر جنرل غیور محمود، میجر جنرل نذیر بٹ، میجر جنرل نوید مختار اور میجر جنرل ہدایت الرحمان شامل ہیں۔

(جاری ہے)

آئی ایس پی آر کے مطابق لیفٹیننٹ جنرل رضوان اختر کو آئی ایس آئی کا نیا سربراہ مقرر کیا گیا ہے۔ اس کے علاوہ لیفٹیننٹ جنرل نوید مختار کو کور کمانڈر کراچی ، لیفٹیننٹ جنرل نذیر احمد بٹ آئی جی سی اینڈ آئی ٹی، لیفٹیننٹ جنرل ہلال حسین کور کمانڈر منگلا، لیفٹیننٹ جنرل ہدایت الرحمان کور کمانڈر پشاور اور لیفٹیننٹ جنرل غیور محمود کو کور کمانڈر گوجرانوالہ تعینات کیا گیا ہے۔واضح رہے کہ آئندہ چند ماہ کے دوران پاک فوج کے کئی لیفٹیننٹ جنرلز ریٹائر ہورہے ہیں جن میں آئی ایس آئی کے موجودہ سربراہ لیفٹیننٹ جنرل ظہیر الاسلام بھی شامل ہیں۔ آئی ایس آئی کے نئے سربراہ حال ہی ڈی جی رینجرز سندھ کی ذمہ داریوں سے سبکدوش ہوئے ہیں۔