لاہور واقعہ انتہائی شرمناک ہے ،واقعہ پر جوڈیشل انکوائری کسی صورت قابل قبول نہیں،وزیر اعلی پنجاب، وزیر قانون پنجاب اور چیف سیکرٹری پنجاب فوری طور استعفی دیں،عمران خان ، آئی جی پنجاب کو گرفتار کر کے ان کے خلاف کاروائی کی جائے۔ایک سال کاکردگی نے ثابت کردیا ہے کہ نوازشریف لیڈر نہیں وگرنہ وہ خود مذاکرات و دھاندلی کے مسائل حل کرتے اور مذاکراتی عمل کو لیڈ کرتے، شمالی وزیرستان آپریشن کا اعلان بھی حکومت نے نہیں بلکہ آئی ایس پی آر نے کیا۔دھاندلی کے خلاف جلسے انتخابی اصلاحات کے لئے کر رہے ہیں، تحریک انصاف کسی گرینڈ الائنس کا نہ تو حصے بنے گی اور نہ ہی کوئی گرینڈ الائنس بنائے گی ،بہالپور کے جلسے میں حکومت کو چار حلقوں میں دھاندلی کی تحقیقات کے لئے ڈیڈ لائن دیں گے،پریس کانفرنس سے خطاب
اسلام آباد( اُردو پوائنٹ اخبار تازہ ترین۔18جون۔2014ء)پاکستان تحریک انصاف کے چیئرمین عمران خان نے کہا ہے کہ لاہور میں عوامی تحریک کے کارکنان کے خلاف پولیس کے ناجائز استعمال کا واقعہ انتہائی شرمناک ہے ،واقعہ پر جوڈیشل انکوائری کسی صورت قابل قبول نہیں بلکہ وزیر اعلی پنجاب، وزیر قانون پنجاب اور چیف سیکرٹری پنجاب فوری طور استعفی دیں اور آئی جی پنجاب کو گرفتار کر کے ان کے خلاف کاروائی کی جائے۔
ایک سال کاکردگی نے ثابت کردیا ہے کہ نوازشریف لیڈر نہیں وگرنہ وہ خود مذاکرات و دھاندلی کے مسائل حل کرتے اور مذاکراتی عمل کو لیڈ کرتے، شمالی وزیرستان آپریشن کا اعلان بھی حکومت نے نہیں بلکہ آئی ایس پی آر نے کیا۔دھاندلی کے خلاف جلسے انتخابی اصلاحات کے لئے کر رہے ہیں، تحریک انصاف کسی گرینڈ الائنس کا نہ تو حصے بنے گی اور نہ ہی کوئی گرینڈ الائنس بنائے گی البتہ بہالپور کے جلسے میں حکومت کو چار حلقوں میں دھاندلی کی تحقیقات کے لئے ڈیڈ لائن دیں گے اور اگر اس پر عمل درآمد نہ کیا گیا تو اگلے لائحہ عمل کا اعلان کیا جائے گاجبکہ پارٹی کے وائس چیئرمین شاہ محمو قریشی نے کہا ہے کہ اپوزیشن لیڈر قومی اسمبلی کے ساتھ تحریک انصاف نے انتخابی اصلاحات کا اجلاس رکھا تھا تاہم لاہور واقعہ کے بعد اس کی ضرورت نہیں رہی اور آج لاہور میں جاکر عوامی تحریک سمیت دیگر جماعتوں کے ساتھ ملاقات کر کے واقعہ پر اگلے لائحہ عمل کا اعلان کریں گے۔
(جاری ہے)
ایک سوال پر عمران خان نے کہا کہ طاہر القادری اور شیخ رشید کو گرفتار کرنے کے حوالے سے خبریں پہلے ہی چل رہی تھیں اور یہ اسی کی کڑی ہے، تحریک انصاف نے شمالی وزیرستان آپریشن کے لئے وزیر اعظم کی حمایت کی اپیل پر اپنا 22جون کا جلسہ ملتوی کر دیا تھا مگر اب سونامی 27کو بہاولپور جائے گی، شمالی وزیر یستان آپریشن کے حوالے سے ان کا کہنا تھا کہ حکومت نے ہمیں اعتماد میں نہیں لیا بلکہ اسی طرح ٹی وی پر پتہ چلا اور وہ بھی آئی ایس پی آر نے اعلان کیا حکومت نے اعلان نہیں کیا کہ آپریشن کیا جا رہا ہے۔
تحریک انصاف نے کمیٹی میں رستم شاہ مہمند کو اس حوالے سے رکھا ہوا تھا کہ مذاکرات کی کامیابی کے لئے وہ کردار ادا کریں مگر حکومت نے نہ تو تحریک انصاف کو اعتماد میں لیا ہے اور نہ ہی کے پی کے حکومت کو اعتماد میں لیا گیا حالانکہ آپریشن کے بعد سارے متاثرین وہاں آئیں گے اور اس کا ردعمل بھی خیبرپختونخواہ کو اٹھانا پڑے گا۔آپریشن کے لئے کوئی تیاری نہیں کی گئی ، نہ معلوم متارین کہاں جائیں گے۔ایک سوال کے جواب پر ان کا کہنا تھا کہ ایک سال میں ثابت ہوگیا ہے کہ وزیر اعظم لیڈر ہی نہیں اگر ان میں لیڈر شپ ہوتی تو وہ مذاکرات کو خود لیڈکرتے پہلے تین ماہ تک مذاکرات کو آگے رہ کر چلاتے،مگر وہ بیرون ملک دورے کرتے رہے ، کسی جمہوری ملک میں ایسا نہیں ہوتا کہ ملک حالت جنگ میں اور وزیر اعظم 43لاکھ روزانہ کے بیرون ملک دوروں پر 21لاکھ روزانہ کے اپنے وزیر اعظم ہاوٴس کے اخراجات پر لگائے۔
ایک سوال کے جواب پر انہوں نے واضح کیا کہ تحریک انصاف کے جلسوں کا مقصدکوئی گرینڈ الائنس نہیں بلکہ انتخابی اصلاحات ہے ، اس سے پہلے صرف مطالبات پیش کرتے رہیں اور مگر اب 27جون کے جلسے میں حکومت کو ایک ڈیڈ لائن دیں گے اور اگر اس پر مطالبات پورے نہ ہوئے تو اگلے لائحہ عمل کا اعلان کیا جائے گا،کیونکہ اب تک حکومت کو ثبوت بھی پیش کیے، وائیٹ پیر بھی جاری کیے مگر کچھ نہیں ہوا اور حسب روایت میانوالی انتخاب کے بعد ہمارے خلا ف مقدمات درج کروائے گئے جبکہ حافظ آباد جلسے کے بعد ہمارے خلاف 27مقدمات پنجاب پولیس نے درج کیے، ایسا کہیں نہیں ہوتا، وزیر اعظم ک اس معاملہ پر خود نوٹس لینا چاہیئے تھا اور مسائل حل کروانے چاہیئے تھا آج اگر خیبرپختونخواہ میں کوئی اعتراض اٹھائے تو میں سب سے پہلے اس مسئلے کو ذاتی طور پر حل کرونگا اور کے پی کے پولیس موجودہ حکومت کے دور میں کسی کے خلاف استعمال نہیں ہوئی ۔ایک سوال کے جواب میں انہوں نے کہا کہ آپریشن کے متاثرین کی بھرپور مدد کی جائے، تحریک انصاف اپنی جگہ اور عمران خان فاوٴنڈیشن اپنی جگہ ان کی مدد کرے گی جبکہ دیگر غیر سرکاری تنظیموں کے ذریعے بھی اس معاملے کو حل کیا جائے گا۔مزید متعلقہ خبریں پڑھئیے :
