طالبان قیدی رہا نہ ہونے سے امن مذاکرات ڈیڈلاک کا شکار ہوگئے ہیں، پروفیسر ابراہیم،حکومت اعلانات کے باوجود طالبان کمیٹی سے ملاقات نہیں کررہی، گفتگو

منگل 22 اپریل 2014 07:02

پشاور(اُردو پوائنٹ اخبار آن لائن۔22اپریل۔2014ء ) طالبان کمیٹی کے رکن پروفیسر ابراہیم نے کہا ہے کہ حکومت کی جانب سے طالبان قیدی رہا نہ ہونے سے امن مذاکرات ڈیڈلاک کا شکار ہوگئے ہیں۔ ایک نجی ٹی وی سے خصوصی گفتگو کرتے ہوئے طالبان کمیٹی کے رکن پروفیسر ابراہیم کا کہنا تھا کہ حکومت اعلانات کے باوجود طالبان کمیٹی سے ملاقات نہیں کررہی۔ اس مسئلے کا حل آپس میں مل بیٹھنے سے ہی نکلے گا۔

(جاری ہے)

انہوں نے کہا کہ وفاقی وزیر داخلہ چودھری نثار نے طالبان قیدیوں کی رہائی کا اعلان کیا لیکن اس پر عمل نہیں کیا گیا جس کی وجہ سے مذاکرات ڈیڈ لاک کا شکار ہیں۔ پروفیسر ابراہیم کا کہنا تھا ابھی تک حکومتی کمیٹی سے بھی ملاقات طے نہیں ہوئی، جتنی جلدی ہو ڈیڈلاک ختم ہونا چاہیے تاکہ دوبارہ مذاکرات شروع کیے جاسکیں۔واضح رہے کہ حکومتی کمیٹی اور طالبان شوریٰ کیدرمیان ایک ملاقات ہوچکی ہے تاہم دوسری ملاقات کب ہونی ہے اس کے لئے ابھی تک جگہ کا تعین نہیں ہوسکا جس کی وجہ سے مذاکرات کی کشتی ایک بار پھر شش و پنج کے منجدھار میں پھنس گئی ہے۔