خیبر پختونخوا میں ذخیرہ کئے گئے سیلابی پانی کا 14 فیصد حصہ ضائع ہو رہا ہے، عالمی بینک کی رپورٹ

پیر 25 جون 2018 11:52

اسلام آباد ۔ (اُردو پوائنٹ اخبارتازہ ترین - اے پی پی۔ 25 جون2018ء) آبپاشی کے بنیادی ڈھانچہ کے نقائص کے باعث خیبر پختونخوا اپنے حصہ کا 2.81 ملین ایکڑ فٹ کم پانی استعمال کر سکتا ہے۔

(جاری ہے)

عالمی بینک کی رپورٹ کے مطابق پاکستان میں پانی کی صوبائی تقسیم کے مطابق آبی وسائل میں کے پی کے کا حصہ 8.78 ملین ایکڑ فٹ ہے جبکہ دوران سال خیبر پختونخواہ صرف 5.97 ملین ایکڑ فٹ آبپاشی کا پانی استعمال کر سکتا ہے اس کے علاوہ ذخیرہ کئے گئے سیلابی پانی کا 14 فیصد حصہ بھی ضائع ہو رہا ہے۔

رپورٹ کے مطابق خیبر پختوتخوا میں آبپاشی کے پانی کی ترسیل کا نظام پرانا ہونے کی وجہ سے اس کی استعداد میں کمی واقع ہوئی ہے جس کے نتجیہ میں خیبر پختونخوا اپنے حصہ کا پانی بھی استعمال کرنے سے قاصر ہے۔ عالمی بینک نے صوبہ میں آبپاشی کے پانی کے بنیادی دھانچہ کی توسیع اور بہتری کیلئے 160 ملین ڈالر مالیت کا منصوبہ تیار کیا ہے جس پر آئیندہ سال 2019ء کے آغاز میں کام شروع ہونے کی توقع ہے۔