آزاد، منصفانہ اور شفاف انتخابات کے انعقاد کیلئے حافظ آباد پولیس اپنا بھرپور کردار ادا کرے گی،ڈی پی او سیف اللہ خاں

اتوار 24 جون 2018 23:50

حافظ آباد(اُردو پوائنٹ اخبارتازہ ترین - آن لائن۔ 24 جون2018ء) ڈسٹرکٹ پولیس آفیسر حافظ آباد سیف اللہ خاںنے کہا ہے کہ آزاد، منصفانہ اور شفاف انتخابات کے انعقاد کیلئے حافظ آباد پولیس اپنا بھرپور کردار ادا کرے گی۔ ڈی پی او حافظ آباد کا اپنے دفتر سے جاری کردہ بیان میں کہنا تھا کہ جنرل الیکشن 2018میں حصہ لینے والے تمام امیدواران کیلئے الیکشن کمیشن کی جانب سے جاری کردہ ضابطہ اخلاق کی پابندی کرنا لازم ہے اور اس کی خلاف ورزی کسی صورت برداشت نہیں کی جائیگی۔

ان کا مزید کہنا تھا کہ نہ صرف اسلحہ کی نمائش بلکہ اسلحہ ساتھ لے کر چلنے پر بھی سخت پابندی ہے خواہ اسلحہ لائسنسی ہو۔ خلاف ورزی کی صورت میں قانون فوراًً حرکت میں آئیگا۔ ڈی پی او حافظ آباد کاکہنا تھا کہ امیدواران اپنی تشہیر ضابطہ اخلاق کے مطابق ہی کرنے کے پابندہوں گے اور الیکشن کمیشن کی متعین کردہ سائز اور مقام پر ہی پینافلیکس آویزاں کیے جا سکیںگی بصورت دیگر قانون کے تحت کاروائی کی جائیگی۔

(جاری ہے)

ان کا کہنا تھا کہ سیاسی اجتماعات کو مکمل سیکورٹی فراہمم کی جائیگی لیکن اس کیلئے باضابطہ طور پر پیشگی اجازت لینا ضروری ہے۔ ڈی پی او حافظ آباد سیف اللہ خاں کا کہنا تھا کہ حافظ آباد پولیس ضابطہ اخلاق کی خلاف ورزی پر بلا تخصیص اور بلا تفریق کاروائی کرے گی اور کسی کے ساتھ کوئی نرمی نہیں برتی جائیگی۔