پروڈیوسر رمیش تورانی کا فلم سیریز ’’ریس‘‘کا چوتھا حصہ بنانے کا اعلان

فلم ریس 2008 میں ریلیز ہوئی تھی اور اس میں سیف علی خان نے مرکزی کردار ادا کیا تھا

اتوار 24 جون 2018 11:30

ممبئی(اُردو پوائنٹ اخبارتازہ ترین - این این آئی۔ 24 جون2018ء) بالی وڈ کی کامیاب فلم سیریز ’ریس‘ کے تیسرے حصے کو تجزیہ کاروں کی شدید تنقید کا سامنا کرنا پڑا، تاہم یہ باکس آفس پر شاندار بزنس کرنے میں کامیاب رہی۔ اور اب فلم کا چوتھا حصہ بنانے کا بھی اعلان کردیا گیا ہے۔اگر آپ کو ایسا لگتا ہے کہ فلم ریس 3 کے بعد ریس 4 نہیں بنائی جائے گی، تو پروڈیوسر رمیش تورانی نے اس غلط فہمی کو بھی دور کردیا۔

پروڈیوسر نے اعلان کیا کہ ریس 4 بھی جلد بنائی جائے گی۔ انہوں نے یہ بھی بتادیا کہ سلمان خان ریس 4 کا بھی حصہ ہوں گے۔خیال رہے کہ فلم ’ریس 3‘ رواں سال عیدالفطر پر ریلیز ہوئی، جس نے ریلیز کے 4 روز میں ہی 120 کروڑ روپے کما لیے۔ فلم دنیا بھر میں اب تک 250 کروڑ روپے کما چکی ہے۔خیال رہے کہ فلم ریس 2008 میں ریلیز ہوئی تھی اور اس میں سیف علی خان نے مرکزی کردار ادا کیا تھا، اس فلم میں اکشے کھنہ اور کترینہ کیف نے منفی کردار ادا کیا تھا اور بپاشا باسو نے مرکزی کردار ادا کیا تھا۔

(جاری ہے)

انیل کپور اس فلم میں پولیس افسر بنے تھے۔فلم ’ریس 2‘ 2013 میں سامنے آئی، جس میں دوبارہ سیف علی خان نے ہی مرکزی کردار ادا کیا۔ اس فلم میں اکشے کھنہ کی جگہ جان ابراہم نے منفی کردار میں شاندار اداکاری کی، جبکہ ان کا ساتھ جیکولین فرنینڈز نے دیا۔ فلم کی مرکزی اداکارہ کا کردار دپیکا پڈوکون نے ادا کیا، جبکہ انیل کپور نے ریس 2 میں اپنا وہی کردار دوبارہ دھرایا۔’ریس 3‘ کی کاسٹ اور کہانی مکمل طور پر تبدیل کردی گئی، جس میں صرف جیکولین فرنینڈز اور انیل کپور دوبارہ نظر آئے۔ تاہم سیف علی خان کی جگہ اس بار سلمان خان نے لے لی۔فلم کو سوشل میڈیا پر بھی تنقید کا نشانہ بنایا گیا، تاہم کہا گیا کہ یہ صرف سلمان خان کے اسٹارڈم کے باعث کامیاب ہورہی ہے۔