نااہل ، چور اور کرپٹ (ن) لیگ والے آخر کب تک باشعور عوام کو مزید بے وقوف بنا تے رہیں گے ،عوام نے فیصلہ کر لیا نواز شریف کا ساتھ نہیں دیں گے،محمد اشرف بھٹی

ہفتہ 23 جون 2018 20:57

لاہور (اُردو پوائنٹ اخبارتازہ ترین - آن لائن۔ 23 جون2018ء) پاکستان پیپلز پارٹی لاہور کے سینئر نائب صدر محمد اشرف بھٹی نے کہا ہے کہ نااہل ، چور اور کرپٹ (ن) لیگ والے آخر کب تک باشعور عوام کو مزید بے وقوف بنا تے رہیں گے عوام نے فیصلہ کر لیا ہے کہ وہ نواز شریف کا ساتھ نہیں دیں گے (ن) لیگ نے ہمیشہ اپنے ہر دور حکومت میں عوام کے ساتھ سوتیلی ماں جیسا سلوک کیا ہے اور ان کی محرومیوں میں اضافہ کیا ہے۔

(جاری ہے)

انہوں نے کہا کہ (ن) لیگ لاہور کو پیرس قرار دیتی ہے اور ان کے پیرس لاہور میں جگہ جگہ کچرے کے ڈھیر لگے ہوئے ہیں لوگ گندا پانی پینے پر مجبور ہیں جبکہ شریف فیملی کے بچوں کے لیے پینے کا پانی بھی باہر سے آتا ہے (ن) لیگ نااہل لیگ کے بعد ناکام لیگ بن چکی ہے۔ً انہوں نے کہا کہ (ن) لیگ کی حکومت عوام کو ڈلیور کرنے میں بری طرح سے فیل ہو چکی ہے (ن) لیگ نے عوام کے مسائل حل کرنے کے بجائے مسائل میں مزید اضافہ کیا ہے عوام اپنے ووٹ کی طاقت سے ان کا احتساب کریں گے اور انشاء اللہ پیپلز پارٹی بھاری اکثریت سے کامیابی حاصل کرے گی اور بلاول بھٹو کو وزیراعظم بنائے گی آنے والی حکومت پیپلز پارتی کی ہو گی ۔