کابینہ کمیٹی نے آئی جیز اور چیف سیکریٹرٹیز کے تبادلوں پر اظہار تشویش نہیں تفصیلی رپورٹ طلب کی ،ترجمان سینیٹ

کابینہ کمیٹی ریگولیٹری اتھارٹیز کو متعلقہ وزارتوں کے تحت نہیں خودمختار حیثیت میں کام کرنے کی حامی ہے، کمیٹی نے پیمرا کے حوالے سے مفصل رپورٹ طلب کی ہے ،ترجمان سینیٹ کا وضاحتی بیان

ہفتہ 23 جون 2018 12:17

کابینہ کمیٹی نے آئی جیز اور چیف سیکریٹرٹیز کے تبادلوں پر اظہار تشویش ..

اسلام آباد(اُردو پوائنٹ اخبارتازہ ترین - آئی این پی۔ 23 جون2018ء) سینیٹ کے ترجمان نے کہا ہے کہ گزشتہ روزسینیٹ کی کابینہ سیکریٹریٹ کمیٹی کے اجلاس کی جاری ہونے والی خبر میں یہ لکھا گیا کہ ریگولیٹری اتھارٹیز کو متعلقہ وزارتوں کے ماتحت ہونا چاہئے اور یہ کہ آئی جیز اور چیف سیکرٹریز کے تبادلوں پر تشویش کا اظہار کیا ۔واضح رہے کہ کمیٹی نے آئی جیز اور چیف سیکرٹریز کے تبادلوں کی تفصیلی رپورٹ طلب کی ہے جبکہ کمیٹی نے ریگورلیٹری اتھارٹیزکے حوالے سے یہ موقف اختیار کیا تھا کہ سینیٹ نے اس پر واضح نقطہ نظر دیا ہوا ہے اور کمیٹی اس امر کی بھر پور حمایت کرتی ہے کہ ان اداروں کو متعلقہ وزارتوں کے ماتحت نہیں ہونا چاہئے۔

اس ضمن میں اس بات کی تصحیح کی جاتی ہے کہ کمیٹی ریگولیٹری اتھارٹیز کو متعلقہ وزارتوں کے تحت نہیں بلکہ خودمختار حیثیت میں کام کرنے کی حامی ہے تاہم کمیٹی نے پیمرا کے حوالے سے مفصل رپورٹ طلب کی ہے ۔

(جاری ہے)

کمیٹی نے اس حوالے سے ڈائرکشن دی ہے کہ ریگولیٹری اتھارٹیز کو متعلقہ وزارتوں کے ماتحت نہیں ہونا چاہئے پیمرا جو وزارت اطلاعات کے ماتحت ہے اسے بھی متعلقہ وزارت سے نکال کر خود مختار کرنے کی سفارش کی ہے۔ جبکہ کمیٹی نے آئی جیز اور چیف سیکریٹرٹیز کے حالیہ تبادلوں پر تشویش کا اظہار نہیں بلکہ تفصیلی رپورٹ طلب کی ہے۔