Live Updates

اپیلیٹ ٹریبونل نے چوہدری نثار کے کاغذات نامزدگی منظور کئے جانے کے خلاف درخواستیں مسترد کردیں

جمعہ 22 جون 2018 16:37

اپیلیٹ ٹریبونل نے چوہدری نثار کے کاغذات نامزدگی منظور کئے جانے کے خلاف ..
راولپنڈی(اُردو پوائنٹ اخبارتازہ ترین - این این آئی۔ 22 جون2018ء) ہائی کورٹ کے اپیلیٹ ٹریبونل نے سابق وزیر داخلہ چوہدری نثار کے کاغذات نامزدگی منظور کئے جانے کے خلاف درخواستیں مسترد کردیں۔میڈیا رپورٹ کے مطابق ہائی کورٹ کے جسٹس عباد الرحمان لودھی پر مشتمل اپیلیٹ ٹریبونل نے سابق وزیر داخلہ چوہدری نثار کے این اے 59، پی پی 10 اور پی پی 12 سے کاغذات نامزدگی منظور کئے جانے کے خلاف درخواستوں کی سماعت کی۔

ٹریبونل کے روبرو درخواست گزار شاہد اورکزئی نے موقف اختیار کیا کہ بحیثیت وزیر اعظم نواز شریف کے دوسرے دور میں سپریم کورٹ پر حملہ ہوا تھا اور اس وقت چوہدری نثار بھی نواز شریف کے ہمراہ تھے، اس کے علاوہ ٹریبونل میں جمع کرایا گیا بیان حلفی بھی نامکمل ہے ،ْاس لئے ان کے کاغذات نامزدگی مسترد کئے جائیں۔

(جاری ہے)

فریقین کے دلائل سننے کے بعد ٹریبونل نے قرار دیا کہ سپریم کورٹ پر حملے میں چوہدری نثار کے ملوث ہونے کے کوئی ثبوت فراہم نہیں کئے۔

اس کے علاوہ ان کی جانب سے جمع کرایا گیا بیان حلفی بھی مکمل ہے۔ اس لئے درخواستیں مسترد کی جاتی ہیں۔دوسری جانب اپیلیٹ ٹریبونل نے این اے 64 جہلم سے تحریک انصاف کے رہنما فواد چوہدری کے کاغذات نامزدگی منظور کئے جانے کے خلاف درخواست پر بھی ہفتے کے لیے نوٹس جاری کردیئے ہیں۔
Live پاکستان تحریک انصاف سے متعلق تازہ ترین معلومات