Live Updates

مسلم لیگ ن نے مختلف زبانوں میں اپنی انتخابی مہم کا آغاز کر دیا

مسلم لیگ ن کی ٹویٹر پر انتخابی مہم 6 زبانوں میں چلائی جا ئے گی

Sumaira Faqir Hussain سمیرا فقیرحسین جمعرات 21 جون 2018 17:51

اسلام آباد (اُردو پوائنٹ تازہ ترین اخبار۔ 21 جون 2018ء) : سابق حکومتی جماعت مسلم لیگ ن نے عام انتخابات سے قبل اپنی انتخابی مہم چلانے کا آغاز کردیا ہے۔ مسلم لیگ ن کی انتخابی مہم ایک نہیں، دو نہیں بلکہ 6 مختلف زبانوں میں شروع کی گئی ہے۔ مائیکروبلاگنگ ویب سائٹ ٹویٹر پر مسلم لیگ ن نے 6 مختلف علاقائی زبانوں میں اپنی انتخابی مہم کا آغاز کر دیا ہے۔

مسلم لیگ ن کے صدر شہباز شریف نے ٹویٹر پر 6 مختلف علاقائی زبانوں کے ٹویٹر اکاؤنٹس کا اجرا کر دیا ہے۔ ان 6 زبانوں میں پنجابی ، سندھی ، بلوچی ، پشتو، سرائیکی اور براہوی زبانیں شامل ہیں۔مسلم لیگ ن کے صدر اور ساباق وزیر اعلیٰ پنجاب شہباز شریف ان چھ زبانوں میں ٹویٹ کریں گے۔مسلم لیگ ن کے صدر شہباز شریف کا کہنا ہے کہ ان چھ مختلف زبانوں میں ٹویٹس کا مقصد عوام میں جمہوریت کے بارے میں اعتماد پیدا کرنا ہے۔

(جاری ہے)

انہوں نے کہاکہ چھ زبانوں میں ٹویٹس کرنا مسلم لیگ ن کی الیکشن مہم کا حصہ ہے۔ تاکہ مختلف علاقائی زبانیں بولنے والوں تک اپنا پیغام زیادہ واضھ طریقے سے پہنچا سکیں۔
شہبازشریف نے چھ مختلف ٹویٹر اکاؤنٹس سے ٹویٹس بھی کیے۔
جبکہ سرائیکی کے ٹویٹر اکاؤنٹ سے فی الوقت کوئی ٹویٹ نہیں کیا گیا۔

واضح رہے کہ عام انتخابات 2018ء کی تیاریاں عروج پر ہیں۔ ملک کی تمام سیاسی جماعتوں نے عام انتخابات میں اُمیدواروں کو ٹکٹ دینے اور اپنی پارٹی پالیسی کو مرتب کرنے کے ساتھ ساتھ انتخابی مہم کا بھی آغاز کر دیا ہے۔ تمام سیاسی جماعتیں انتخابی مہم کے لیے جلسے جلوسوں کے ساتھ ساتھ سوشل میڈیا ویب سائٹس کا بھی سہارا لے رہی ہیں۔
Live وزیراعظم شہباز شریف سے متعلق تازہ ترین معلومات