Live Updates

ایپلٹ ٹربیونلز نے تحریک انصاف کے 5اقلیتی امیدواروں کی اپیلیں خارج کردیں

مہندر سنگھ پال، یوڈسٹر چوہان، ہارون گل، اعجاز مسیح اور پیٹر گل نے ایپلٹ ٹربیونل میں اپیل دائر کی تھی

جمعرات 21 جون 2018 13:06

لاہور (اُردو پوائنٹ اخبارتازہ ترین - این این آئی۔ 21 جون2018ء) ریٹرننگ افسران کی جانب سے امیدواروں کے کاغذات نامزدگی مسترد ہونے کے خلاف ایپلٹ ٹریبونلز میں سماعت کا سلسلہ جاری، لاہور کے ٹربیونلز نے تحریک انصاف کے 5اقلیتی امیدواروں کی اپیلیں خارج کردیں۔تفصیلات کے مطابق لاہور کے ایپلٹ ٹربیونل کے جسٹس فیصل زمان خان نے تحریک انصاف کے اقلیتی امیدواروں کی اپیلوں پر محفوظ کیا گیا فیصلہ سناتے ہوئے ریٹرننگ افسران کے فیصلے برقرار رکھے ہیں۔

ایپلٹ ٹربیونل نے پی ٹی آئی اقلیتی امیدواروں کی تمام اپیلیں خارج کردیں، پی ٹی آئی کی جانب سے مہندر سنگھ پال، یوڈسٹر چوہان، ہارون گل، اعجاز مسیح اور پیٹر گل نے ایپلٹ ٹربیونل میں اپیل دائر کی تھی۔اپیل کنندہ کا اپنی درخواستوں میں کہنا تھا کہ تحریک انصاف نے اقلیتی امیدواران کی لسٹ مقررہ وقت کے بعد الیکشن کمیشن میں جمع کرائی اور امیدواروں کی لسٹ نہ ہونے کے باعث کاغذات نامزدگی مسترد کر دیئے گئے۔

(جاری ہے)

اپیل کنندہ نے ایپلٹ ٹربیونل سے اپیل کی تھی کہ لسٹ اب الیکشن کمیشن میں جمع ہوگئی ہے اس لیے عدالت الیکشن میں حصہ لینے کا اہل قرار دیتے ہوئے ریٹرننگ افسر کا فیصلہ کالعدم قرار دے جائے۔الیکشن ٹربیونل نے لاہور کے حلقہ این اے 131 سے مسلم لیگ (ق) کی امیدوار زیبا احسان کی اپیل پر بھی فیصلہ محفوظ کرلیا۔اپیل کنندہ کا درخواست میں کہنا تھا کہ ریٹرننگ آفیسر نے حقائق کے برعکس کاغذات مسترد کیے، آر او نے تجویز کنندہ کے حلقے سے نہ ہونے پر کاغذات مسترد کیے تاہم تجویز کنندہ حلقے میں ہی ووٹ کاسٹ کرتا رہا ہے۔
Live پاکستان تحریک انصاف سے متعلق تازہ ترین معلومات