الیکشن کمیشن کا امیدواروں کی تفصیلات عام کرنے کا فیصلہ۔ ریٹرننگ افسران نے امیدواروں کا ڈیٹا اسکین کر کے الیکشن کمیشن سیکرٹریٹ بھجوانا شروع کر دیا

بدھ 20 جون 2018 15:04

الیکشن کمیشن کا امیدواروں کی تفصیلات عام کرنے کا فیصلہ۔ ریٹرننگ افسران ..
اسلام آباد (اُردو پوائنٹ اخبارتازہ ترین - این این آئی۔ 20 جون2018ء) الیکشن کمیشن نے عام انتخابات میں حصہ لینے والے امیدواروں کی تفصیلات عام کرنے کا فیصلہ کیا ہے۔ذرائع الیکشن کمیشن کے مطابق کاغذات نامزدگی جمع کرانے والے امیدواروں کی معلومات ویب سائٹ پر جاری کی جائیں گی تاکہ امیدواروں کی تمام معلومات انٹرنیٹ پر ووٹرز کو دستیاب ہوں۔ ذرائع کے مطابق الیکشن کمیشن کے فیصلے کے مطابق امیدواروں کے کاغذات نامزدگی میں ظاہر کیے گئے اثاثوں کی تفصیلات اور دیگر معلومات جاری کی جائیں گی ،ْاسی کے ساتھ امیدواروں کے حلف ناموں کی تفصیلات بھی ویب سائٹ پر جاری کی جائیں گی اور اس حوالے سے ریٹرننگ افسران نے امیدواروں کا ڈیٹا اسکین کر کے الیکشن کمیشن سیکرٹریٹ بھجوانا شروع کر دیا ہے۔

یاد رہے کہ سپریم کورٹ نے انتخابات میں حصہ لینے والے امیدواروں کو حلف نامہ جمع کرانا لازمی قرار دیا ہے جس کے بعد کئی امیدواروں نے انتخابات میں حصہ نہ لینے کا فیصلہ کیا ہے جس میں سرفہرست سیف اللہ فیملی ہے۔

(جاری ہے)

الیکشن کمیشن ذرائع کا کہنا ہے کہ گزشتہ انتخابات کے مقابلے میں الیکشن 2018 میں حصہ لینے والے امیدواروں کی تعداد کم ہے۔ ذرائع الیکشن کمیشن کا کہنا ہے کہ 2013 میں 28 ہزار 302 امیدواروں نے کاغذات جمع کرائے ،ْ انتخابات 2018 کے لیے 21 ہزار 482 امیدواروں نے کاغذات جمع کرائے ہیں۔