بھارت ، گردوغبار کا طوفان، 10افراد ہلاک ،

متعدد مکانات منہدم، نظام زندگی مفلوج

جمعرات 14 جون 2018 15:27

نئی دہلی(اُردو پوائنٹ اخبارتازہ ترین - آئی این پی۔ 14 جون2018ء) بھارتی ریاست اتر پردیش میں گردوغبار کے طوفان میں 10افراد ہلاک ، متعدد مکانات منہدم ہوگئے، نظام زندگی مفلوج ہوکر رہ گیا۔بھارتی میڈیا کے مطابق بھارتی ریاست یوپی میں گردوغبار کے طوفان میں 10افراد ہلاک ہوگئے۔ ریاست کے مختلف علاقوں میں رات گئے گرد آلود آندھی سے وسطی اور مشرقی یوپی کے پروانچل میں مکانات منہدم ہوگئے۔

درخت کے نیچے دب کر 2بچے ہلاک ہوگئے۔ طوفان گردوباد سے نظام زندگی مفلوج ہوکر رہ گیا۔

(جاری ہے)

سیکڑوں درخت جڑوں سے اکھڑ کر سڑکوں پر آگرے جس سے ٹریفک اژدہام پیدا ہوگیا۔کچے مکانات کی چھتیں اڑ گئیں۔گرد آلودطوفان نے سب سے زیادہ سیتا پور میں تباہی پھیلائی ۔ وہاں 7افراد کی موت واقع ہوئی۔ یہاں ایک مسجد کا مینار گرنے سے ایک شخص دب کر ہلاک ہوگیا۔ فیض آباد ضلع میں بھی ایک شخص کی موت ہوگئی۔ سیتا پور میں 17اور فیض آباد میں 11افرادزخمی ہوگئے۔ یوپی حکومت کے ترجمان نے بتایا کہ متاثرہ اضلاع میں راحت رسانی کی ٹیمیں علاقے میں روانہ کردی گئیں۔واضح ہو کہ آندھی اور طوفان بادوباراں کے باعث اتر پردیش میں اب تک150سے زائد افراد ہلاک ہوچکے ہیں ۔