الفطیم رینالٹ نے پاکستان میں پیداوار کیلئے صنعتی پلانٹ حاصل کرلیا

فیصل آباد (اُردو پوائنٹ اخبارتازہ ترین - آن لائن۔ 13 جون2018ء) الفطیم رینالٹ پاکستان نے اعلان کیا ہے کہ انہوں نے رینالٹ گاڑیوں کی پاکستان میں پیداوار اور اسمبلیوں کے پلانٹ لگانے کے لیے صنعتی پلاٹ حاصل کرلیا ہے۔یہ پلانٹ فیصل آباد کے خصوصی اقتصادی زون میں ایم 3 انڈسٹریل سٹی میں لگائے جائیں گے۔الفطیم آٹوموٹو انٹرنیشنل کے سینیئر مینیجنگ ڈائریکٹر کولن کورڈری کا کہنا تھا کہ الفطیم پاکستانی مارکیٹ اور اپنے منصوبے کے لیے پر عزم ہے۔

ان کا کہنا تھا کہ یہ منصوبہ غیر ملکی ڈائریکٹ سرمایہ کاری کو پاکستان میں لانے میں اہم کردار ادا کرے گا۔منصوبے کا ڈیزائن اور پری انجینیئرنگ کام جاری ہے جبکہ سائٹ پر کام کا آغاز جلد کردیا جائے گا۔اس منصوبے کا 2018 کے آخری تک باقاعدہ طور پر انعقاد بھی کردیا جائے گا۔

(جاری ہے)

کام مکمل ہوجانے پر اسمبلی پلانٹ سے تقریبا 50 ہزار گاڑی فی سال پیدا کی جائیں گی۔

الفطیم اور رینالٹ کو امید ہے کہ فیکٹری میں پیداوار کا آغاز 2020 تک ہوجائے گا۔الفطیم رینالٹ پاکستان منصوبے کے چیف ایگزیکٹو آفیسر (سی ای او) یاسر علوی کا کہنا تھا کہ رینالٹ اپنی گاڑیوں کی کوالٹی اور حفاظت کی وجہ سے مشہور ہے، ہم پاکستانی صارفین کے لیے جدید ڈسٹی بیوشن اور ڈیلر شپ نیٹ ورک کے ذریعے یورپین ٹیکنالوجی لے کر آئیں گے۔