خدیجہ حملہ کیس،

اپیل سماعت کیلئے باضابطہ طور پرمنظور ، سپریم کورٹ کا ملزم کو ایک لاکھ کے مچلکے جمع کروانے کا حکم

بدھ 13 جون 2018 14:38

لاہور (اُردو پوائنٹ اخبارتازہ ترین - آئی این پی۔ 13 جون2018ء) سپریم کورٹ نے خدیجہ صدیقی حملہ کیس سے متعلق اپیل سماعت کے لیے باضابطہ طور پرمنظور کرتے ہوئے ملزم شاہ حسین کو ایک لاکھ کے مچلکے جمع کروانے کی ہدایت کر دی۔ بدھ کو سپریم کورٹ لاہور رجسٹری میں جسٹس آصف سعید کھوسہ کی سربراہی میں دو رکنی بنچ نے خدیجہ صدیقی کی اپیل پر سماعت کی اور کیس گرمیوں کی عدالتی تعطیل کے بعد سماعت کے لیے مقرر کر دیا ۔

(جاری ہے)

دوران سماعت جسٹس آصف سعید کھوسہ نے ریمارکس دیئے کہ کیا وجہ تھی کہ خدیجہ صدیقی اور اس کی چھوٹی بہن نے پوری دنیا چھوڑ کر ملزم شاہ حسین پر الزام لگایا جسٹس آصف سعید کھوسہ نے ملزم کے وکیل سے استفسار کیا کہ کیا یہ دونوں قانون کے طالبعلم ہیں اس واقعہ کے بعد دونوں نے قانون سے متعلق کافی کچھ سیکھ لیا ہوگا۔دوران سماعت جسٹس آصف سعید نے ریمارکس دیئے کہ واقعہ دن کے وقت ہوا رات ہوتی تو شک کی گنجائش باقی تھی۔