فیصل آباد چیمبر کا حکومت پنجاب کی جانب سے رمضان کے دوران آٹے پر سبسڈی دینے کے فیصلے کا خیر مقدم

منگل 29 مئی 2018 23:45

فیصل آباد۔ 29مئی(اُردو پوائنٹ اخبارتازہ ترین - اے پی پی۔ 29 مئی2018ء) فیصل آباد چیمبر آف کامرس اینڈانڈسٹری نے حکومت پنجاب کی طرف سے رمضان کے دوران آٹے پر سبسڈی دینے کے فیصلے کا خیر مقدم کرتے ہوئے مطالبہ کیا ہے کہ اس سہولت کو پنجاب کے عوام کیلئے سال بھر جاری رکھا جائے، فیصل آباد چیمبر آف کامرس اینڈانڈسٹری کی ایگزیکٹو کمیٹی کے اجلاس سے خطاب کرتے ہوئے صدر شبیر حسین چاولہ نے کہا کہ گندم کے وافر سٹاک کی وجہ سے پنجاب حکومت نے چند ماہ قبل ہی گندم برآمد کرنے کی اجازت دی تھی جبکہ اس سلسلہ میں 1300 روپے فی من والی گندم کیلئے 800 روپے کے حساب سے دینے کا فیصلہ کیا تھا۔

انہوں نے بتایا کہ اس فیصلے کے بعد لوگوں کی طرف سے مطالبہ کیا گیا کہ پنجاب کے عوام گندم پیدا کرتے ہیں انہیں بھی فاضل گندم پیدا کرنے کے بدلے میں سستے نرخوں پر آٹا مہیا کیا جائے۔

(جاری ہے)

انہوں نے کہا کہ پنجاب حکومت کی طرف سے رمضان کے دوران سستے نرخوںپر آٹا مہیا کیا جار ہا ہے جس سے خاص طور پر غریب عوام کو کافی سہولت مل رہی ہے۔ انہوں نے کہا کہ پنجاب حکومت کی طرف سے لوگوں کو سستے نرخوں پر آٹے کی فراہمی اچھا اقدام ہے لیکن اس کو صرف رمضان تک محدود نہ رکھا جائے بلکہ اس کو سارا سال جاری رکھا جائے کیونکہ اس وقت حکومت کے پاس گندم کے پرانے سٹاک کے علاوہ نئی فصل کا بھی وافر ذخیرہ موجود ہے۔