وزیر اعلی محمد شہباز شریف کا سول سیکرٹریٹ میں اعلی سول ، پولیس اور انتظامی افسران سے خطاب

لاہور (اُردو پوائنٹ اخبارتازہ ترین - آن لائن۔ 25 مئی2018ء) وزیراعلیٰ پنجاب محمد شہبازشریف نے کہا ہے کہ پنجاب حکومت نے ٹیم ورک کے طور پر کام کر کے عوامی خدمت کے حوالے سے تاریخ رقم کی ہے -افسران نے ہمت ، محنت اور عز م کے ساتھ کام کیا ہے اورمیں آپ کی محنت اور پیشہ وارانہ مہارت کو سلام پیش کرتا ہوں -آپ نے ہر شعبے میں نئے باب رقم کئے ہیں -تعلیم ، صحت اور دیگر شعبوں میں مثبت نتائج دیئے گئے ہیں - پنجاب حکومت نے عوام کو بہترین خدمات کی فراہمی یقینی بنائی ہے -سیاستدانوں ، بیوروکریسی اور پولیس کے ساتھ دیگر افسران نے یک جان دوقالب ہو کر فرائض سرانجام دیئی-آپ سب نے اپنی محنت سے نئی دنیا آباد کی ہے -آپ نے خوشبو ؤں سے مہکتا ہوا باغ بنایا ہے -اس باغ کی خوشبو ہر طرف پھیلی ہوئی ہے -دیگر صوبوں کے ساتھ عالمی سطح پر بھی پنجاب کی تعریف آپ کی تعریف ہے -عوام کی خدمت کیلئے آپ نے دن دیکھا نہ رات -وزیر اعلی محمد شہباز شریف نے ان خیالات کا اظہار دربار ہال سول سیکرٹریٹ میں اعلی سول ، پولیس اور انتظامی افسران سے خطاب کرتے ہوئے کیا- وزیر اعلی نے اعلی کارکردگی پر اعلی سول ، پولیس و انتظامی افسران کو نقد انعامات اور تعریفی سرٹیفکیٹس بھی دیئی-وزیر اعلی نے کہا کہ پنجاب آج ترقی وخوشحالی کی طرف گامزن ہے اوردنیا بھی پنجاب کی تیز رفتار ترقی کو تسلیم کرتی ہے -انہوںنے کہا کہ پنجاب حکومت نے ہمیشہ شفافیت، معیار اور رفتار کو فوقیت دی-توانائی کے منصوبوں پر جس تیز رفتاری سے کام کیا گیا وہ اپنی مثال آپ ہے -اللہ تعالی نے پانچ سال قبل جو ذمہ داری دی تھی اس میں سرخرو ہوئے ہیں -آپ نے پنجاب میں جو کام کیا ہے وہ پاکستان کی خدمت ہے -ہر شعبے میں انقلابی اقدامات کے مثبت نتائج سامنے آئے ہیں -انہوںنے کہا کہ انتھک محنت کے ساتھ فرائض سرانجام دیئے یہی وجہ ہے کہ دنیا پنجاب کی ترقی کے گن گاتی ہے - وزیر اعلی نے کہا کہ آپ کے ساتھ گزارے میری زندگی کے بہترین لمحات ہیں -اگر میری کسی بات سے کسی کی دل آزاری ہوئی تو میں معذرت خواہ ہوں -تقریب سے چیف سیکرٹری اور انسپکٹرجنرل پولیس نے بھی خطاب کیا ۔