اسفندیارولی خان کی فاٹا اصلاھات بل کی منظوری پر قوم کو مبارکباد

جمعرات 24 مئی 2018 22:11

پشاور(اُردو پوائنٹ اخبارتازہ ترین - آئی این پی۔ 24 مئی2018ء) عوامی نیشنل پارٹی کے سربراہ اسفندیارولی خان نے فاٹا اصلاحات بل کی منظوری پر ساری قوم کو مبارکباد دی ہے۔ قومی اسمبلی سے 31ویں آئینی ترمیم کی منظوری کے بعد اپنے بیان میں اے این پی کے مرکزی صدر نے آج کے دن کو تاریخی قراردیتے ہوئے ممبران قومی اسمبلی کا شکریہ ادا کیا۔انہوں نے کہا کہ فاٹا کا انضمام ملکی سلامتی اور مضبوطی کا ضامن ہوگا۔

(جاری ہے)

انہوں نے مزید کہا کہ فاٹا کے عوام نے بہت تکالیف اور نقصانات اٹھائے ہیں اور اب وقت آگیا ہے کہ ان کے علاقوں میں ہنگامی بنیادوں پر ترقی کا عمل شروع کیا جاسکے تاکہ وہ اپنے اپنے علاقوں میں امن وسکون کے ساتھ زندگی بسر کرسکیں۔اسفندیارولی خان نے کہا کہ اس تاریخی مرحلے کیلئے ہمارے مشران نے سختیاں جھیلیں ہیں، تکالیف اٹھائے ہیں، مسلسل جدوجہد کی ہے۔ آج کا دن ساری دنیا میں بسنے والے پختونوں کیلئے خوش بختی کا دن ہے اور اسی لئے تمام پختونوں کو مبارکباد دیتا ہوں اور امید رکھتا ہوں کہ ہر آنے والا دن پختونوں کیلئے امن، سکون، ترقی اور خوشحالی کا باعث ہو۔