ٍپاکستان صحت کے شعبے میں بنگلادیش، سری لنکا اور بھارت سے بھی پیچھے

صحت کے شعبے میں دنیا کے 195 ممالک میں سے پاکستان 154 نمبر پر ہے ،ْرپورٹ

جمعرات 24 مئی 2018 17:01

نیویارک (اُردو پوائنٹ اخبارتازہ ترین - این این آئی۔ 24 مئی2018ء) ایک طبی جریدے میں شائع ہونے والی رپورٹ میں انکشاف کیا گیا ہے کہ پاکستان صحت کے شعبے میں بنگلادیش، سری لنکا، بھوٹان اور بھارت سے بھی پیچھے ہے۔معروف برطانوی طبی جرنل دی لانسٹ کی ایک رپورٹ کے مطابق علاج معالجے کی سہولیات کی فراہمی اور معیار کے اعتبار سے 195 ممالک میں پاکستان کا 154 واں نمبر ہے۔

(جاری ہے)

اس فہرست کے مطابق چین 48 ویں، سری لنکا 71، بنگلہ دیش 133، بھوٹان 134، بھارت 145 اور نیپال 149 ویں نمبر پر ہے۔رپورٹ کے مطابق علاج معالجے کی سہولیات کی فراہمی اور معیار کے اعتبار سے سب سے بہترین آئس لینڈ، ناروے، نیدر لینڈ، لیگسمبرگ، فن لینڈ اور آسٹریلیا ہے۔رپورٹ کے مطابق 195 ممالک میں صحت کے شعبے میں سب سے ناقص کارکردگی دکھانے والے ممالک میں وسطی افریقا، صومالیا، گنی بساؤ، چاڈ اور افغانستان شامل ہیں۔