انتخابات کے پرامن انعقاد اور اقتدار کی خوش اسلوبی سے منتقلی سے ملائیشیائی قوم کی پختگی کی عکاسی ہوتی ہے

وزیراعظم شاہد خاقان عباسی کا ملائیشیائی ہم منصب ڈاکٹر مہاتیر محمد کو ٹیلیفون

بدھ 23 مئی 2018 15:10

انتخابات کے پرامن انعقاد اور اقتدار کی خوش اسلوبی سے منتقلی سے ملائیشیائی ..
اسلام آباد ۔ (اُردو پوائنٹ اخبارتازہ ترین - اے پی پی۔ 23 مئی2018ء) وزیراعظم شاہد خاقان عباسی نے اپنے ملائیشیائی ہم منصب ڈاکٹر مہاتیر محمد کو ٹیلیفون کیا اور انہیں وزارت عظمیٰ کا منصب سنبھالنے پر مبارکباد دی۔ وزیراعظم نے ملائیشیاء میں انتخابات کے پرامن انعقاد اور اقتدار کی خوش اسلوبی سے منتقلی کو سراہتے ہوئے کہا کہ اس سے ملائیشیائی قوم کی پختگی کی عکاسی ہوتی ہے۔

انہوں نے کہا کہ سیاسی اتحاد ’’پاکاتان ہاراپان‘‘ کی بے مثال کامیابی ڈاکٹر مہاتیر محمد کی فعال اور متاثر کن قیادت پر عوامی اعتماد کی مظہر ہے۔ انہوں نے ملائیشیائی ہم منصب کے ساتھ پاک ملائیشیاء تعلقات پر تبادلہ خیال کیا اور معیشت، سرمایہ کاری، توانائی، دفاع اور سیاحت کے شعبوں میں مواقع کی تلاش کے ذریعے دوطرفہ تعلقات کو مزید تقویت دینے کی خواہش کا اظہار کیا۔

(جاری ہے)

وزیراعظم شاہد خاقان عباسی نے جموں و کشمیر اور فلسطین سمیت مسلم امہ کو درپیش مسائل کو بھی اجاگر کیا۔ انہوں نے دوطرفہ تعلقات کو ضروری تقویت اور سمت کی فراہمی کے لئے پارلیمانی تبادلوں سمیت اعلیٰ سطح کے دوروں کے تبادلوں کی ضرورت پر بھی زور دیا۔ انہوں نے ڈاکٹر مہاتیر محمد کو دورہ پاکستان کی دعوت بھی دی۔ وزیراعظم ڈاکٹر مہاتیر محمد نے نیک خواہشات پر وزیراعظم کا شکریہ ادا کرتے ہوئے دوطرفہ تعلقات کو مزید مضبوط بنانے اور وسعت دینے کے اپنے عزم کا اظہار کیا۔