سانحہ نشترپارک سمیت 13 ہائی پروفائل مقدمات فوجی عدالت منتقل

کراچی کے 7 اور سکھر کے 6 مقدمات شامل ،جج ایڈوکیٹ جنرل برانچ نے ملزمان کی تحویل اور مقدمات کی فائل کے لئے عدالتوں سے رجوع کرلیا

جمعہ 18 مئی 2018 21:48

اسلام آباد(اُردو پوائنٹ اخبارتازہ ترین - آئی این پی۔ 18 مئی2018ء) سندھ کی انسدادِدہشت گردی عدالتوں میں کئی برس سے زیرِالتوا سانحہ نشترپارک سمیت ہائی پروفائل مقدمات فوجی عدالت بھیج دیئے گئے، فوجی عدالتوں میں بھیجے گئے مقدمات میں کراچی کے 7 اور سکھر کے 6 مقدمات ہیں،جج ایڈوکیٹ جنرل برانچ نے ملزمان کی تحویل اور مقدمات کی فائل کے لئے عدالتوں سے رجوع کرلیا ۔

تفصیلات کے مطابق سندھ کی انسداد دہشت گردی کی عدالتوں میں گزشتہ کئی برسوں سے زیرِالتوا ہائی پروفائل مقدمات کو اب فوجی عدالتوں میں بھیج دیا گیا ہے۔ فوجی عدالتوں میں بھیجے گئے مقدمات میں کراچی کے 7 اور سکھر کے 6 مقدمات ہیں جن میں سانحہ نشتر پارک، انسداد پولیو ورکر ٹیم پر حملہ، سچل بم دھماکا اور دیگر قتل کے مقدمات شامل ہیں۔

(جاری ہے)

فوجی عدالت منتقل کئے گئے مقدمات میں کالعدم تحریک طالبان پاکستان اور کالعدم لشکرِ جھنگوی سمیت ہائی پروفائل دہشت گرد امین عرف معاویہ، ممتاز عرف فرعون، امجد صابری قتل کیس میں سزائے موت پانے والے اسحاق بوبی کے خلاف 3 مقدمات اور دیگر 15 سے زائد دہشت گرد بھی شامل ہیں۔

مقدمات کے حوالے سے انسداد دہشت گردی اور سیشن عدالتوں کو مقدمات کی فہرست بھی موصول ہوگئی ہے جب کہ جج ایڈوکیٹ جنرل برانچ نے ملزمان کی تحویل اور مقدمات کی فائل کے لئے عدالتوں سے رجوع کرلیا ہے۔