ْٹرمپ کا چینی کمپنی زیڈ ٹی ای پر عائد امریکی پابندیاں ہٹانے کا اعلان،

واشنگٹن(اُردو پوائنٹ اخبارتازہ ترین - این این آئی۔ 17 مئی2018ء) امریکا کے صدر ڈونلڈ ٹرمپ نے چینی کمپنی زیڈ ٹی ای پر سے پابندی ہٹانے کااعلان کرتے ہوئے کہاہے کہ امریکا نے تجارتی معاہدوں میں چین کو بہت کچھ دیا ہے اب چین کی امریکا کو بہت کچھ دینے کی باری ہے۔غیرملکی خبررساں ادارے کے مطابق امریکی صدر ڈونلڈ ٹرمپ نے اپنے ایک بیان میں امریکی پابندیوں کی خلاف ورزی کرتے ہوئے ایران کے ساتھ تجارت کرنے پر چینی کمپنی زیڈ ٹی ای پر عائد جرمانے پر نظر ثانی کے فیصلے کا دفاع کرتے ہوئے کہا کہ یہ تجارتی معاہدے کا عکاس ہے جس کے حوالے سے امریکا اپنے تجارتی حریف چین کے ساتھ مذاکرات کر رہا ہے۔

امریکی صدر کا کہنا تھا کہ چینی کمپنی زیڈ ٹی ای کے ساتھ ابھی کچھ نہیں ہوا کیونکہ اس کمپنی کا تعلق چین،امریکا تجارتی معاہدے سے ہے،سابق صدر باراک اوباما کی پالیسیی کو تنقید کا نشانہ بناتے ہوئے صدر ڈونلڈ ٹرمپ کا کہنا تھا کہ ہمیں ابھی تک چینی مطالبات موصول نہیں ہوئے ہیں جو گزشتہ حکومت میں اوباما انتظامیہ کے ناکام مذاکرات کی وجہ سے وجود میں آئے تھے،انہوں نے مزید کہا کہ امریکا، چین کو تجارتی معاہدوں میں بہت کچھ دے چکا ہے، لیکن اب چین کی باری ہے جسے بہت کچھ دینا ہے۔

(جاری ہے)

ادھر امریکی قانون سازوں نے امریکی صدر ڈونلڈ ٹرمپ کی جانب سے زیڈ ٹی ای کی پابندیوں میں نرمی کے منصوبے کو مسترد کرتے ہوئے کہا کہ چینی ٹیلی کمیونیکیشن کمپنی امریکا کی قومی سلامتی کے لیے خطرہ ہے۔انہوں نے زور دیا کہ امریکا کے محکمہ تجارت کے اس فیصلے کو ختم نہ کیا جائے جو چینی کمپنی پر امریکی آلات اور سافٹ ویئر بیچنے پر پابندی عائد کرتا ہے۔

اس پابندی نے زیڈ ٹی ای کو امریکا میں اپنے آپریشن بند کرنے پر مجبور کردیا تھا تاہم ڈونلڈ ٹرمپ کی جانب سے سامنے آنے والے بیان میں کہا گیا کہ انہوں نے امریکا کے محکمہ تجارت کو ہدایت دی ہے کہ وہ ان پابندیوں کو ختم کرنے کے لیے اقدامات کرے تاکہ چینی کمپنی امریکا میں اپنا کام کرنے کے لیے دوبارہ اہل ہوجائے۔تاہم ڈیموکریٹ سے تعلق رکھنے والے 33 سینیٹرز کے دستخط شدہ خط میں امریکی صدر پر زور دیا گیا کہ وہ اپنے فیصلے پر نظر ثانی کریں۔

سینیٹرز کا خط میں کہنا تھا کہ معاہدوں کی مدد سے چین میں امریکیوں کے لیے ملازمت کے مواقع فراہم کرنا واضح طور پر ان کی سیکیورٹی کے لیے خطرہ ثابت ہوسکتا ہے۔ان کا مزید کہنا تھا کہ امریکا کی چین کے لیے پالیسیوں میں وضع طور پر بیجنگ نہیں بلکہ امریکی ملازمین، کسان اور کارروباری افراد اولین ترجیح ہونے چاہیئں۔