اصغر خان کیس ،ْاسلم بیگ اور اسد درانی سے 2 گھنٹے تک پوچھ گچھ

سابق وزیراعظم نواز شریف سمیت تمام متعلقہ افراد کے بیانات ریکارڈ کیے جائیں گے

بدھ 16 مئی 2018 23:10

اسلام آباد (اُردو پوائنٹ اخبارتازہ ترین - این این آئی۔ 16 مئی2018ء) اصغر خان کیس میں ایف آئی اے کی 4 رکنی تحقیقاتی ٹیم نے سابق آرمی چیف جنرل ریٹائرڈ اسلم بیگ اور سابق آئی ایس آئی چیف لیفٹیننٹ جنرل ریٹائرڈ اسد درانی سے پوچھ گچھ کی ، دونوں افسران سے دو، دو گھنٹے تک سوال جواب کیے گئے۔

(جاری ہے)

نجی ٹی وی کے مطابق ذرائع نے بتایا کہ سب سے پہلے جنرل ریٹائرڈ اسلم بیگ ایف آئی اے ہیڈ کوارٹرز پہنچے جہاں وہ ایڈیشنل ڈی جی ایف آئی اے احسان صادق کی زیر صدارت ایف آئی اے ڈائریکٹر پنجاب ڈاکٹر عثمان انور ، ڈائریکٹر امیگریشن ڈاکٹر محمد رضوان اور ڈائریکٹرلا ء علی شیر جاکھرانی پر مشتمل تحقیقاتی ٹیم کے سامنے پیش ہوئے اور 2 گھنٹوں تک ا یف آئی اے افسران کے سوالوں کے جواب دئیے ۔

ان کے بعد لیفٹیننٹ جنرل ریٹائرڈ اسد درانی بھی اسی کمیٹی کے سامنے پیش ہوئے اور 2گھنٹوں تک سوالوں کے جواب دئیے ۔ایف آئی اے ٹیم سپریم کورٹ کی طرف سے سال 2012میں اصغر خان کیس کے دئیے گئے فیصلے کے پیرا گراف نمبر 14کے تحت کارروائی کررہی ہے اور اس کے مطابق پیسے لینے والے سیاستدانوں کے خلاف ثبوت ملنے پر کارروائی کی جائے گی ۔ذرائع کا کہنا ہے کہ اس سلسلے میں سابق وزیراعظم نواز شریف سمیت تمام متعلقہ افراد کے بیانات ریکارڈ کیے جائیں گے ۔