رمضان المبارک کے پیش نظر فوڈ اتھارٹی کے نئے اوقات کار اور آپریشنز کا لائحہ عمل جاری

حکومتی احکامات کے مطابق فوڈ اتھارٹی کے دفتری اوقات کار آٹھ کی بجائے چھ گھنٹے کے کر دیئے گئے

جمعرات 17 مئی 2018 00:08

لاہور (اُردو پوائنٹ اخبارتازہ ترین - آن لائن۔ 16 مئی2018ء) رمضان المبارک کے پیش نظر فوڈ اتھارٹی کے نئے اوقات کار اور آپریشنز کا لائحہ عمل جاری کر دیا گیا ہے۔حکومتی احکامات اور چیف سیکرٹری آفس سے جاری کردہ حکم نامے کے مطابق فوڈ اتھارٹی کے دفتری اوقات کار آٹھ کی بجائے چھ گھنٹے کے کر دیئے گئے۔ترجمان پنجاب فوڈ اتھارٹی نے تفصیلات سے آگاہ کرتے ہوئے بتایا کہ فوڈ اتھارٹی ہیڈ آفس اور تمام ضلعی دفاتر صبح آٹھ سے دوپہر دو بجے تک کھلے رہیں گے۔

(جاری ہے)

رمضان المبارک میں ڈیلی آپریشن ٹیموں کی تعداد دو بڑھا کر تین کر دی گئی ہے۔ ترجمان نے مزید بتایا کہ سہری اور افطاری کے وقت چیکنگ کے لیے سپیشل آپریشنل ٹیمیں فیلڈ میں موجود رہیں گی۔ تمام آپریشن ٹیمیں آٹھ آٹھ گھنٹے کے اوقات کار کے مطابق کام جاری رکھیں گی۔ میٹ اور ڈیری سیفٹی ٹیمیں بھی رمضان المبارک میں تین شفٹوں میں کام کریں گی۔ ترجمان کا مزید کہنا تھا کہ ڈی جی فوڈ اتھارٹی نورالامین مینگل نے تمام ٹیموں کو خصوصی ہدایات جاری کر دیں۔ ویجلنس ٹیموں کو رمضان المبارک میں ملاوٹ مافیا کے خلاف سخت سے سخت کاروائی کرنے کی بھی ہدایت جاری کر دی گئی ہیں۔