فیصل آبادوومن چیمبرآف کامرس کو مزید متحرک اورفعال بنانے کیلئے اس کی ممبر خواتین کی تعداد کو فوری طور پر دوگنا کیا جا رہا ہے، روبینہ امجد

فیصل آباد۔16 مئی(اُردو پوائنٹ اخبارتازہ ترین - اے پی پی۔ 16 مئی2018ء) فیصل آبادوومن چیمبرآف کامرس اینڈانڈسٹری کو مزید متحرک اورفعال بنانے کیلئے اس کی ممبر خواتین کی تعداد کو فوری طور پر دوگنا کیا جا رہا ہے۔ یہ بات وومن چیمبر کی صدر روبینہ امجد نے یہاں ایگزیکٹو کمیٹی کے خصوصی اجلاس سے خطاب کرتے ہوئے بتائی۔ انہوں نے بتایا کہ فیصل آباد میں خواتین کی بڑی تعداد کاروبار سے منسلک ہے جن کو اس پلیٹ فارم پر لانے کیلئے کوششیں جاری ہیں۔

انہوں نے بتایا کہ یہ خواتین وومن چیمبر کے پلیٹ فارم پر آکر نہ صرف اپنے انفرادی بلکہ اجتماعی کاروباری مسائل کے حل کیلئے بھی منظم انداز میں جدوجہد کر سکتی ہیں۔ انہوں نے تمام ایگزیکٹو ممبران سے کہا کہ وہ اپنے لئے رضا کارانہ طور پر نئی ممبرشپ کاہدف مقرر کریں اور کوشش کی جائے کہ ہر ماہ کم از کم اتنی تعداد میں نئی خواتین کو لازمی طور پر اس چیمبر کی ممبرشپ دلوائی جائے۔

(جاری ہے)

انہوں نے مزید بتایا کہ رمضان کے فوراً بعد خواتین کی کاروباری مہارتوں کو اجاگر کرنے کیلئے جی آئی زیڈ کے اشتراک سے ایک کانفرنس منعقد کی جائیگی جس کے تحت حکمت عملی تیار کی لی گئی ہے ۔ انہوں نے چیمبر کی گزشتہ ماہ کی کارکردگی کو بھی سراہا جبکہ ایگزیکٹو نے سابقہ اجلاس کی کارروائی کی بھی توثیق کی ۔ آخر میں روبینہ امجد نے آزاد کشمیر میں دریا ئے نیلم کے سانحہ پر بھی گہرے رنج و غم کا اظہار کیا اور کہا کہ اس قسم کے واقعات کی روک تھام کیلئے موثر اقدامات کی ضرورت ہے ۔ اس اجلاس میں نائب صدر عروہ نبیل اور سمیرا اشرف سمیت دیگر ممبران نے بھی شرکت کی۔