عالمی چیمپئن جرمن فٹ بال ٹیم کے کوچ جوشم لو کو 2022 ورلڈ کپ تک توسیع مل گئی

بدھ 16 مئی 2018 22:15

برلن (اُردو پوائنٹ اخبارتازہ ترین - آئی این پی۔ 16 مئی2018ء) عالمی چیمپئن جرمن فٹ بال ٹیم کے کوچ جوشم لو کو معاہدے میں مزید دو برس کی توسیع مل گئی، نئے معاہدے کے تحت وہ 2022 تک اپنی ذمہ داریاں جاری رکھیں گے جس میں قطر میں شیڈول ورلڈ کپ بھی شامل ہے، جوشم کی زیر کوچنگ جرمنی کی ٹیم نے 2014 میں برازیل میں منعقدہ ورلڈکپ جیتنے کا اعزاز حاصل کیا تھا، جرمنی نے فیصلہ کن معرکے میں ارجنٹائن کو زیر کر کے چوتھی مرتبہ عالمی ٹائٹل اپنے نام کیا تھا۔

(جاری ہے)

جرمن فٹ بال ایسوسی ایشن کی طرف سے جاری کردہ بیان کے مطابق جوشم اور ایسوسی ایشن کے درمیان 2020 میں شیڈول یورو فائنل تک معاہدہ تھا لیکن اب ہم نے ان کے معاہدے میں مزید دو برس کی تجدید کر دی ہے جس کے تحت جوشم اب 2022 تک اپنے فرائض جاری رکھیں گے۔ 58 سالہ جوشم لو 2006 سے جرمن ٹیم کی کوچنگ کر رہے ہیں، ان کی زیر کوچنگ جرمن ٹیم 160 میچز میں سی106 میں کامیاب رہے اور انہیں کامیاب ترین جرمن کوچ ہونے کا اعزاز حاصل ہے۔