روس جامع ایٹمی معاہدے کو باقی رکھنے کا خواہاں ہے،صدر ولادیمرپیوٹن

منگل 15 مئی 2018 20:44

ماسکو(اُردو پوائنٹ اخبارتازہ ترین - آن لائن۔ 15 مئی2018ء) روس کے صدر ولادی میر پیوٹن نے کہا ہے کہ ہم ایران کیساتھ ہونے والے جامع ایٹمی معاہدے کوباقی رکھنے کے خواہشمند ہیں۔گزشتہ روز جامع ایٹمی معاہدے کے بارے میں ایران اور روس کے وزرائے خارجہ کے درمیان روسی دارالحکومت ماسکو میں ہونے والے مذاکرات کیساتھ ساتھ روس کے صدر ولادی میر پیوٹن نے سوچی میں آئی اے ای اے کے سربراہ یوکیا آمانو سے اہم ملاقات کی۔

(جاری ہے)

بعدازاں روسی وزارت خارجہ نے اپنے ایک بیان میں کہا کہ صدر ولادیمر پیوٹن نے یوکیا آمانو سے ملاقات میں کہا کہ ماسکو ایٹمی معاہدے کو باقی رکھنے اور اس پر عملدرآمد میں دلچسپی رکھتا ہے۔روس کے صدر نے ایٹمی معاہدے سے امریکاکی علیحدگی پر گہری تشویش کا اظہار کرتے ہوئے معاہدے کو باقی رکھنے کی اہمیت پر زور دیا۔آئی اے ای اے کے ڈائریکٹرجنرل نے اس موقع پر کہا کہ ہمارے معائنہ کاروں کی رپورٹوں کے مطابق ایران ایٹمی معاہدے پر مکمل عملدرآمد کر رہا ہے۔