پاکستان تمام علاقائی ممالک کے ساتھ دوستانہ تعلقات استوار رکھنے اور خطہ میں امن کیلئے ہمیشہ کوشاں رہا ہے

وزیراعظم شاہد خاقان عباسی کی نیپالی فوج کے چیف آف آرمی سٹاف جنرل رجیندرا چھیتری سے گفتگو

منگل 15 مئی 2018 19:09

پاکستان تمام علاقائی ممالک کے ساتھ دوستانہ تعلقات استوار رکھنے اور ..

اسلام آباد۔ (اُردو پوائنٹ اخبارتازہ ترین - اے پی پی۔ 15 مئی2018ء) وزیراعظم شاہد خاقان عباسی نے کہا کہ پاکستان تمام علاقائی ممالک کے ساتھ دوستانہ تعلقات استوار رکھنے اور خطہ میں امن کیلئے ہمیشہ کوشاں رہا ہے۔ انہوں نے یہ بات نیپالی فوج کے چیف آف آرمی سٹاف جنرل رجیندرا چھیتری سے گفتگو کرتے ہوئے کہی جنہوں نے منگل کو یہاں ان سے ملاقات کی۔

وزیر دفاع و خارجہ امور خرم دستگیر اور سینئر حکام بھی اس موقع پر موجود تھے۔ ملاقات کے دوران دوطرفہ تعلقات سے متعلق امور پر تبادلہ خیال کیا گیا۔ وزیراعظم نے اس بات پر زور دیا کہ پاکستان نے ہمیشہ تمام علاقائی ممالک کے ساتھ دوستانہ تعلقات استوار رکھنے اور خطہ میں قیام امن کی کاوش کی ہے۔ وزیراعظم نے کہا کہ پاکستان نے دہشت گردی کے خلاف جنگ میں اقتصادی لحاظ اور قیمتی جانوں کے ضیاع کے حوالہ سے خطیر قربانیاں دی ہیں۔

(جاری ہے)

وزیراعظم نے امید ظاہر کی کہ پاکستان اور نیپال کے درمیان دفاع کے شعبہ میں تعاون سمیت دوطرفہ تعلقات کو مزید تقویت ملے گی۔ نیپالی فوج کے سربراہ نے نیپال کے وزیراعظم کھگداد پرشاد اولی کی طرف سے وزیراعظم کو نیک خواہشات پہنچائیں۔ انہوں نے پاک فوج کی اعلیٰ پیشہ وارانہ مہارت کو سراہتے ہوئے دہشت گردی کے خلاف جنگ میں ان کی قربانیوں کا اعتراف کیا۔