نواز شریف نے خود ہی اعتراف جرم کر لیا ،اپنی جماعت کی حکومت کو بھی چارج شیٹ کیا ہے‘

لاہور (اُردو پوائنٹ اخبارتازہ ترین - این این آئی۔ 15 مئی2018ء) پاکستان پیپلز پارٹی کے سیکرٹری اطلاعات سینیٹر مولا بخش چانڈیو نے کہا ہے کہ نواز شریف نے خود ہی اعتراف جرم کر لیا اور اپنی جماعت کی حکومت کو بھی چارج شیٹ کیا ہے ، جب نواز شریف خود اعتراف کریں کہ ملک تنہا ہو چکا تو اندازہ لگایا جا سکتا ہے کہ حالات کیا ہیں۔ انہوں نے سابق وزیر اعظم نواز شریف کے تازہ بیان پر ردعمل کا اظہار کرتے ہوئے کہا کہ پاکستان اگر دنیا میں تنہا ہے تو اس کے ذمہ دار نواز شریف ہیں، نواز شریف بتائیں انہوں نے چار سال تک وزیر خارجہ کیوں مقرر نہ کیا، ہمارے چیئرمن بلاول بھٹو زرداری مسلسل کہتے رہے کہ وزیر خارجہ لگائیں ہم دنیا میں تنہا ہو رہے ہیں۔

انہوں نے کہا کہ (ن) لیگ کی حکومت ملکی معاملات چلانے کے بجائے شریف خاندان کی لوٹی دولت بچانے میں لگی ہوئی ہے، لیگی حکومت کا نہ اندورنی معاملات پر توجہ ہے نہ خارجہ امور پر۔

(جاری ہے)

نواز شریف روزانہ قوم کے ساتھ مزاق کر رہے ہیں، نواز شریف وزیراعظم تو ملک کے بنے لیکن ملکی معاملات کے بجائے ذاتی کاروبار چلاتے رہے، میاں صاحب بتائیں آج کس سے گلا کر رہے ہیں، ملک کو تنہا تو انہوں نے خود کیا،نواز شریف کی جاتی امرا کے گرد گھومتی پالیسیوں نے وفاق کو بھی کمزور کیا۔

سینیٹر مولابخش چانڈیو نے کہا کہ نواز شریف نے اپنے پرانے ادوار کی طرح اس بار بھی ملک کے ساتھ سانحات کئے ہیں، جب نواز شریف خود اعتراف کریں کہ ملک تنہا ہو چکا تو اندازہ لگایا جا سکتا ہے کہ حالات کیا ہیں، نواز شریف کل تک جس خارجہ پالیسی کا کریڈٹ لیتے رہے آج اسے ہی ناکام قرار دے دیا، خواجہ آصف پر کیوں چھوڑا ، چار سال تو وزارت خارجہ میاں صاحب کے پاس رہی، قوم کو سچ بتائیں، قوم حیران نہ ہو جلد نواز شریف اپنی حکومت کی معاشی ناکامیوں کا بھی اعتراف کریں گے۔ انہوں نے کہا کہ گملوں میں اگے لیڈر ایسے ہی ہوا کرتے ہیں، جیسے میاں صاحب ہیں، میاں صاحب اب بات بے بات رونا چھوڑ دیں۔