آئی جی سندھ کے زیر صدارت اجلاس، رمضان المبارک میں امن و امان یقینی بنانے کے اقدامات کا جائزہ لیا گیا

کراچی(اُردو پوائنٹ اخبارتازہ ترین - آئی این پی۔ 14 مئی2018ء) آئی جی سندھ اے ڈی خواجہ نے سینٹرل پولیس آفس میں ایک اعلیٰ سطحی اجلاس کی صدارت کرتے ہوئے ہدایات دیں کہ ماہ رمضان کے تینوں عشروں کے دوران پولیس سیکیورٹی میکنزم کے مجموعی اقدامات کو مربوط، موٴْثر اور ٹھوس بناتے ہوئے ترتیب کردہ کنٹی جنسی پلان پر عمل درآمد کو یقینی بنایا جائے تاکہ عوام کی جان ومال کے تحفظ کے جملہ امور کو غیر معمولی بنایا جاسکے ۔

اجلاس میں ایڈیشنل آئی جی کراچی،ڈی آئی جیزحیدر آباد، اسپیشل برانچ،سی آئی اے، سکھر،لاڑکانہ،میر پور خاص، شہید بینظیر آباد،ہیڈکوراٹرز سندھ،ایڈمن کراچی اور زونل ڈی آئی جیز کراچی سمیت اے آئی جیز ایڈمن آپریشنز، فنانس اور لاجسٹکس نے بھی شرکت کی۔

(جاری ہے)

ایڈیشنل آئی جی کراچی کی رپورٹ کے مطابق ایسٹ، ویسٹ اور ساؤتھ میں 4215 مساجد/نماز وتروایح/محافل شبینہ/ کھلے مقامات پر دوران رمضان اضافی نفری کے علاوہ 26780 سے زائد پولیس افسران و جوان سیکیورٹی/ٹریفک فرائض انجام دینگے جبکہ500سے زائد موبائلوں اور662 موٹر سائیکل سوار افسران و جوان اسنیپ چیکنگ علاقہ پیٹرولنگ پر مامور کئے جارہے ہیں۔

انہوں نے بتایا کہ مذکورہ مجموعی ڈپلائمنٹ میں کراچی پولیس کے 19400سے زائد جبکہ کراچی ٹریفک رینج کے تمام سیکشنز میں تعینات 7380 سے زائد ٹریفک پولیس افسران و جوان شامل ہیں۔علاوہ اذیں ٹریفک پولیس افسران و جوان خصوصی ہدایات کے تحت ماڑیپور روڈ سیلیاری ایکسپریس وے کو جانے والے روٹ پر ٹریفک انتظامات اور روانی کے اقدامات کو یقینی بنائیں گے۔

ڈی آئی جی حیدرآباد کی رپورٹ کے مطابق رمضان المبارک کے دوران2108 مساجد/تراویح کے کھلے مقامات و دیگر سیکیورٹی امور پر11622سے زائد افسران وجوان سیکیورٹی فرائض انجام دینگے جس میں216 موبائل اور169موٹر سائیکل پر سوار نفری بھی شامل ہے۔ڈی آئی جی میر پور خاص کی رپورٹ کے مطابق رمضان کے دوران کم وبیش660 مساجد/تراویح کے کھلے مقامات پر6106کے قریب افسران وجوان سیکیورٹی فرائض انجام دے دینگے۔

ڈی آئی جی شہید بینظیرآباد کی رپورٹ کے مطابق رمضان المبارک کے دوران1542 مساجد /تراویح کے کھلے مقامات ودیگرسیکیورٹی امورپر 4504سے زائدافسران وجوان سیکیورٹی فرائض انجام دینگے جس میں موبائل اورموٹرسائیکل پرسوار نفری بھی شامل ہے۔ڈی آئی جی سکھر کی رپورٹ کے مطابق605 مساجد/تراویح کے کھلے مقامات پر 3661 کے قریب افسران و جوان سیکیورٹی فرائض انجام دینگے جس میں موبائل اور موٹر سائیکل پر سوار نفری بھی شامل ہے۔ڈی آئی جی لاڑکانہ کی رپورٹ کے مطابق رمضان کے دوران947مساجد/تراویح کے کھلے مقامات پر 10453سے زائد افسران و جوان سیکیورٹی فرائض انجام دینگے جس میں230کے قریب موبائل اور219 سے زائدموٹر سائیکل پر سوار نفری بھی شامل ہے۔